WedNovWed2018

སྤེལ་དུས་མཐའ་མ།09:45:57 AM GMT

རྩོམ་གསར།:

དགེ་རྒན་ཞིག་ཡིན་ན་ཇི་འདྲ་བ་ཞིག་ཡིན་དགོས།

དགེ་རྒན་ཞིག་ཡིན་ན་ཇི་འདྲ་བ་ཞིག་ཡིན་དགོས།

ཟླ་འདིའི་ཚེས༡༠ཉིན་གྱི་སྔ་དྲོ། མཚོ་སྔོན་དགེ་འོས་སློབ་ཆེན་མི་རིགས་དགེ་འོས་སློབ་གླིང་གི་གླིང་གཙོ་གཞོན་པའམ་དགེ་རྒན་ཆེན་མོ་ལྕགས་ཐར་རྒྱལ་གྱིས་མང་རྫོང་མི་རིགས་སློབ་འབྲིང་གི་ཚོགས་ཁང་ཆེན་མོ་རུ་༼དགེ་རྒན་ཞིག་ཡིན་ན་ཇི་འདྲ་བ་ཞིག་ཡིན་དགོས་༽ཞེས་པའི་འཆད་ཁྲིད་གནང་བ་རེད། དེར་མཚོ་ལྷོ་ཁུལ་མི་རིགས་མཐོ་འབྲིང་གསུམ་པ་དང་མང་རྫོང་མི་རིགས་སློབ་འབྲིང་། མང་རྫོང་མི་རིགས་སློབ་འབྲིང་གཉིས་པ། མང་རྫོང་མཁར་གྲོང་སློབ་ཆུང་གཉིས་པ་སོགས་མང་རྫོང་ས་ཁུལ་གྱི་སློབ་གྲྭ་ཆུང་འབྲིང་གི་སྐད་གཉིས་དགེ་རྒན་སུམ་བརྒྱ་ལྷག་ཞུགས་ནས་ཁོང་གིས་འཆད་ཁྲིད་ལ་ཉན་ཡོད།
དགེ་རྒན་ཁོང་གིས་དུས་ཚོད་གསུམ་ལྷག་གི་འཆད་ཁྲིད་ཧྲིལ་བོར་རང་དཔེ་གཞན་སྟོན་གྱི་སྒོ་ནས་ཁྲིད་སྟེགས་ཀྱི་མདུན་དུ་ལངས་བསྡད་པ་སྟེ།

ཁོང་གི་མི་ཚེའི་དམ་བཅའ་གསུམ་ལས་དུས་ཚོད་ཅི་འདྲ་རིང་བོ་ཞིག་ལ་འཆད་ཁྲིད་བྱེད་དགོས་ཀྱང་ལངས་ནས་འདུག་པ་དང་གཅིག འཆད་ཁྲིད་ཀྱི་སྐབས་སུ་རང་གིས་ཤེས་པའི་ཤེས་བྱ་ནན་ཏན་གྱིས་འཁྲིད་པ་དང་མི་ཤེས་པའི་དོན་ལ་འོལ་ཚོད་ཀྱིས་མི་འགྲེལ་བ་དང་གཉིས། འཆད་ཁྲིད་ཀྱི་སྐབས་སུ་སློབ་མའི་སྔུན་ནས་ཇ་འཐུང་བ་སོགས་མི་བྱེད་པ་དང་གསུམ་བཅས་སོ།།

དགེ་རྒན་གྱི་ལས་ཀ་ནི་འགན་འཁྲི་ལྕི་ཞིང་དོན་སྙིང་ཆེ་བ་དང་།  གཟི་བརྗིད་ལྡན་ལ་མཐར་ཐུག་དགེ་བའི་འགྲོ་བ་མིའི་རིགས་ཀྱིས་བསྒྲུབས་དང་སྒྲུབ་བཞིན་པའི་ལས་རིགས་ཀུན་གྱི་གྲས་ལས་ཆེས་རླབས་ཆེ་བ་རུ་བདོག་པས།  དགེ་རྒན་དང་། སྨན་པ་ཞེས་པ་ནི་བྱ་བའི་ཕན་འབྲས་ཀྱི་ཆ་ནས་བཏགས་པའི་མིང་ཞིག་ཡིན་ཡང་།  སློབ་གསོ་སྤེལ་ལུགས་དང་།  སློབ་མ་སྐྱོང་སྟངས་ཀྱི་ཐད་དུ་གནའ་དེང་གཉིས་ལ་ཁྱད་པར་ཆེ་ཞིང་།   ལྷག་པར་དེང་གི་དུས་འདིར་སློབ་གྲྭ་ཆེ་འབྲིང་ཆུང་བ་གང་དུའང་བོད་ཀྱི་སྲོལ་རྒྱུན་ལྟར་དགེ་རྒན་གྱིས་སློབ་མར་བརྟག་པ་དང་།  སློབ་མས་དགེ་རྒན་གདམ་པའི་འགྲོ་རིམ་གང་ཡང་མེད་པར།  གཞུང་གིས་བཀོད་སྒྲིག་ལྟར་དགེ་རྒན་བཟང་ངན་ཅི་རིགས་སློབ་ཁྲིད་ཀྱི་ལས་ལ་འཇུག་ཅིང་།  སློབ་མ་རབས་དང་རིམ་པ་མང་པོ་བསྐྱངས་ཤིང་སྐྱོང་བ་ལ་རྗེས་འབྲས་ལེགས་ཉེས་ཆ་མི་འཚལ་བ་ཅི་རིགས་སྣང་བའི་དབང་གིས།  སྐབས་མང་པོར་སློབ་མས་དགེ་རྒན་ལ་འཁང་ར་བྱེད་པ་དང་།  ཁྱིམ་བདག་གིས་དགེ་རྒན་ལ་གཤེ་གཤེ་གཏོང་བ།  སྤྱི་ཚོགས་སུ་དགེ་རྒན་ལ་གདེང་འཇོག་དམན་པ།  དགེ་རྒན་གྱིས་ཀྱང་སློབ་མ་མིག་ལ་མི་རན་པའི་སྣང་ཚུལ་སྟོན་གྱིན་ཡོད་པས།  དགེ་རྒན་གྱི་ལས་ལ་ཞུགས་པའི་མི་ཞིག་ཡིན་ན་ཇི་འདྲ་བ་ཞིག་བྱ་དགོས་པའི་སྐོར་ལ། འདིར་གུས་པ་བདག་གི་ལྟ་ཚུལ་རགས་ཙམ་ཞུ་བར་བྱའོ། །


དང་པོ།  དགེ་རྒན་ཞིག་ཡིན་ན་མི་རིགས་ཀྱི་འདུན་མ་ལ་བསམ་བློ་གཏོང་མཁན་ཞིག་ཡིན་དགོས་པ།

རང་གི་ཁ་དང་རྒྱབ་ཀྱི་འཚོ་བའི་ཆེད་དུ་ལས་ཀ་བྱེད་པ་ནི།  མི་དང་བཅས་པའི་སྲོག་ཆགས་ཐུན་མོང་གི་སྤྱི་ཆོས་སུ་གྲུབ་ཅིང་།  སྲོག་ཆགས་ཀྱི་རིགས་ཀུན་ལས་རང་གི་རིགས་མཐུན་སྤྱི་ཡི་ད་ལྟ་དང་མ་འོངས་པའི་འདུན་མ་བསྲུང་ཞིང་།  ཡབ་མེས་རྣམས་ནས་བརྒྱུད་པའི་མྱོང་བ་རྣམས་ཕྱི་རབས་པ་དག་ལ་བརྒྱུད་ཅིང་སྤེལ་བ་དང་།  རང་གི་རིགས་དེ་ཡི་ཐུན་མོང་གི་འཚོ་བའི་གོམས་སྲོལ་དང་རིག་གནས་ཀྱི་དགོས་མཁོའི་དབང་གིས།  རིག་གནས་ཀྱི་ཤེས་བྱ་སྣ་ཚོགས་རང་གི་རིགས་དེ་ལ་སློབ་ཁྲིད་བྱེད་པ་ནི།  མི་ཁོ་ན་མ་གཏོགས་པར་སྲོག་ཆགས་གཞན་གྱི་རིགས་གང་ལའང་མེད་ཕྱིར།  མི་རིགས་སྣ་མང་འདུས་སྡོད་བྱེད་པའི་རང་རེའི་རྒྱལ་ཁབ་འདིར་མི་རིགས་རང་མཚན་པའི་ཁེ་དབང་སྲུང་བའི་སླད་དུ་མི་རིགས་སློབ་གསོ་ཞེས་པའི་སློབ་གསོ་ཡན་གར་པ་ཞིག་ལག་ཏུ་བསྟར་བ་ནི།  མི་རིགས་ཐ་དད་པ་དག་གི་སྐད་ཡིག་རིག་གནས་ཀྱི་ཁྱད་ཆོས་དང་རིན་ཐང་ལ་དམིགས་ཏེ།  མི་རིགས་དག་གི་ཐུན་མོང་མ་ཡིན་པའི་རིག་གནས་བདག་སྐྱོང་དང་དར་འཕེལ་བྱ་བའི་སླད་དུ་སྤེལ་བཞིན་པའི་སློབ་གསོ་ཐབས་ལམ་ཁྱད་པར་བ་ཞིག་ཡིན་ཞིང་།  ལྷག་པར་ཡི་གེ་ཡོད་པའི་མི་རིགས་ཤིག་ཡིན་ན།  ཇི་སྲིད་ཆུ་ཡི་ཐིགས་པ་ཞིག་རྒྱ་མཚོའི་ནང་དུ་བླུག་ན་རྒྱ་མཚོ་མ་འཛད་པ་དེ་སྲིད་དུ་ཆུ་ཐིགས་དེ་ལ་བསྐམ་པའི་དུས་མི་འབྱུང་བ་བཞིན།  མི་རིགས་ཤིག་གི་སྐད་ཆ་དང་རིག་གནས་མ་ཉམས་པ་དེ་སྲིད་དུ་མི་རིགས་དེ་ལ་རང་གི་ཕ་སྐད་ཀྱི་ལམ་ནས་སློབ་ཁྲིད་བྱེད་པའང་ཡུན་རིང་ལ་ཡོད་སྲིད་པས། མི་རིགས་དེའི་སྐད་ཡིག་ལ་བརྟེན་ནས་མི་རིགས་རིག་གནས་རྒྱུན་འཛིན་དང་།  བཀོལ་སྤྱོད་བྱ་བ་ལ་མཁོ་བའི་སྤྱོད་ཡོན་གཉིས་ལྡན་གྱི་མི་སྣ་མང་པོ་སྐྱེད་བསྲིངས་ཏེ།  རྒྱལ་ཁབ་འདི་ཆབ་སྲིད་ཀྱི་ཆ་ནས་བདག་དབང་གཅིག་ཏུ་གྱུར་པ་དང་།  རིག་གནས་ཀྱི་ཐད་དུ་མེ་ཏོག་སྣ་མང་བཀྲ་བའི་དགའ་ཚལ་ཡིད་དུ་འོང་བ་ཞིག་ཏུ་བསྐྲུན་དགོས་སྟབས།  དགེ་རྒན་གྱི་ལས་ཀ་ནི་ནམ་ཡང་མི་རིགས་ཀྱི་འདུན་མ་དང་མཉམ་དུ་གནས་ཤིང་།  དགེ་རྒན་ནི་མི་རིགས་ཤིག་གི་མི་རབས་ཕྱི་མ་གསོ་སྐྱོང་གནང་མཁན་གྱི་བྱེད་པོ་དང་།  རྒྱལ་ཁབ་ཀྱི་འཕེལ་རྒྱས་ལ་མཁོ་བའི་མི་སྣ་འཇོན་ཐང་ཅན་སྐྱེད་སྲིང་བྱེད་མཁན་ཡིན་ཞིང་། མི་རིགས་ཤིག་གི་འཕེལ་རྒྱས་དང་དང་།  རིག་གནས་སློབ་གསོའི་དགོས་མཁོའི་དབང་གིས།  ང་དང་ཁྱོད་ལྟ་བུ་ལ་དགེ་རྒན་ཞེས་པའི་མིང་གིས་བོས་ཏེ།  མི་དམངས་ཀྱི་རྔུལ་ཁྲག་ལས་བསྡུས་པའི་ཕོགས་དངུལ་ལ་བརྟེན་ནས།  མི་སྒེར་དང་ཁྱིམ་ཚང་ཧྲིལ་པོའི་འཚོ་བ་སྐྱེད་པར་བྱེད་པ་འདི་ལགས་ན།  རང་རེ་རྣམས་ཀྱིས་ཀྱང་ནམ་ཡང་རྒྱལ་ཁབ་དང་མི་རིགས་ཀྱི་འདུན་མ་ལ་དམིགས་ཏེ།  དྲིན་ཚོར་ཞིང་དྲིན་དྲན་པ་དང་།  དྲིན་ལན་གཟོ་ཐབས་ལ་འབད་བཞིན།  ད་ལྟའི་མིག་མདུན་གྱི་སློབ་མ་འདི་དག་སྐྱེད་སྲིང་ལེགས་པོ་ཞིག་བྱ་ཐུབ་ན།  རང་ལ་ལས་སྐལ་འདི་གནང་བའི་རྒྱལ་ཁབ་དང་མི་རིགས་ཀྱི་འདུན་མའང་འགྲུབ་ཅིང་།  རང་དང་རིགས་མཐུན་གྱི་མི་རབས་རྗེས་མ་དག་ལའང་ད་དུང་ལས་ཀ་འདི་དང་འདི་འདྲ་བ་བསྒྲུབ་པའི་བསྐལ་པ་ལྡན་ཞིང་།  མི་རིགས་འདི་ལའང་ནམ་ཡང་གཞན་དྲིང་མི་འཇོག་པའི་རིག་གནས་དང་།  གཞན་ལ་མི་རེ་བའི་སྐད་ཆ།  གཞན་དང་མི་མཚུངས་པའི་གོམས་སྲོལ།  གཞན་གྱིས་བསྒྲུབ་མི་ཐུབ་པའི་ལས་ཀ་སྣ་ཚོགས་ཡོད་པ་གསལ་བོར་རྟོགས་བཞིན།  མི་རེ་རེ་བ་ནི་མི་རིགས་ཤིག་གི་ཆ་ཤས་གལ་ཆེན་རེ་ཡིན་ཞིང་།  མི་རིགས་ཞེས་པ་ནི་རང་གི་རིགས་མཐུན་གྱི་བྱེ་བྲག་མང་པོའི་རྗེས་སུ་འགྲོ་བའི་སྤྱི་མཚན་གྱི་སྤྱི་ཞིག་ཡིན་པས།  ང་དང་ཁྱོད་དང་ཁོ་ལ་མི་བརྟེན་པའི་ཚུགས་ཐུབ་ཀྱི་མི་རིགས་རང་དབང་བ་ཞིག་གཞི་མ་གྲུབ་ཅིང་།  མི་སུ་དང་གང་གིས་ཀྱང་མི་རིགས་རེ་རེ་དང་མི་རིགས་དུ་མ་འདུས་པའི་རྒྱལ་ཁབ་ཅིག་ལ་ཞབས་ཏོག་ལེགས་པོ་བསྒྲུབ་མི་ཐུབ་ན་ཡང་ཞབས་འདྲེན་གྱི་ལས་ཀ་ཅིས་ཀྱང་བྱ་མི་འོས་པར།  དགེ་རྒན་གྱི་མིང་གིས་འབོད་པའི་མི་དག་ནི་མི་རིགས་དེ་ཡི་གྲས་ཀྱི་རིག་གནས་པ་དང་།  མི་རབས་ཕྱི་མ་སྐྱོང་བའི་མ་མ།  མ་འོངས་འདུན་མ་གསོ་བའི་ལམ་མཁན་ཡིན་པས།  རང་ཉིད་ཀྱིས་ཉེས་བྱས་ཙམ་ནི་མི་རིགས་ཤིག་གི་ཉེས་པ་དང་།  རྒྱལ་ཁབ་ཅིག་གི་ཞབས་འདྲེན་དུ་འགྱུར་ངེས་ཤིང་།  ལྷག་པར་ད་ལྟར་བཞིན་ལོ་རེར་སློབ་མ༨༠ཙམ་འཕྲོ་བརླག་ཏུ་བཏང་ན།  བགྲང་བྱ་སུམ་ཅུའི་ཡུན་ལ་མི་སྣ༢༤༠༠ལྷག་བྱས་ཉེས་སུ་འགྱུར་ཞིང་།  དེ་ལྟའི་ཉེས་པ་ནི་ཚེ་འདི་ཙམ་མ་ཟད་པར་གལ་ཏེ་སྐྱེ་བ་ཕྱི་མ་ཟེར་བ་ཞིག་ཡོད་ན།  དེ་དུས་སུའང་འདག་ཐུབ་དཀའ་བ་ཡང་ཡང་བསམ་ཞིང་།  བདག་གི་བྱས་ཉེས་འདི་ཡི་དབང་གིས་རང་དང་དངོས་བརྒྱུད་གང་རུང་གི་སློབ་མ་དག་ཀྱང་དེ་བཞིན་ཡིན་ཞིང་།  དེས་ན་མི་རིགས་འདི་ལ་བསྐྱེད་པའི་ཉེས་པ་ནི་མི་གཅིག་གི་ཉེས་པ་ཙམ་མ་ཡིན་པར།  མི་རིགས་ཤིག་གི་འདུན་མ་ལ་གནོད་པའི་ཉེས་པ་ཆེན་པོ་ཞིག་ཏུ་བསམ་ནས།  ང་ནི་མི་རིགས་ཤིག་གི་འཐུས་ཚབ་ཡིན་ལ།  ང་ལ་མི་རིགས་ཤིག་གོང་དུ་འདེགས་པའི་འགན་འཁྲི་ཡོད་པར་རྟོགས་པར་ཏེ།  ནམ་ཡང་སློབ་མ་ལ་ཕན་ཞིང་སྤྱི་ཚོགས་ལ་དགེ་བ། ཚེ་འདི་ལ་ལེགས་ཤིང་ཕྱི་མ་ལ་བཟང་བའི་ལས་ཀ་འདི་ལ་འབད་པ་ལྷོད་བྱའོ། །

གཉིས་པ།  དགེ་རྒན་ཞིག་ཡིན་ན་ནམ་ཡང་སློབ་མ་ལ་བརྩེ་བ་ལྡན་པ་ཞིག་ཡིན་དགོས་པ།

མི་ནི་ནམ་ཡང་བརྩེ་བས་བསྐྱང་དགོས་པའི་བདག་ཉིད་ཅན་ཞིག་ཡིན་ཞིང་།  སློབ་མ་རྣམས་ནི་ན་སོ་མ་སྨིན་ཞིང་སྤྱི་ཚོགས་ཀྱི་འཚོ་བ་ལ་ཆ་རྒྱུས་གསལ་པོ་མེད་པ།  དཀར་ནག་གི་དབྱེ་བ་འབྱེད་པའི་ནུས་པ་ཞན་ཞིང་།  རིག་པའི་གནས་ལ་རིམ་གྱིས་འཇུག་ཅིང་མི་གཞི་ད་དུང་གཏན་པོ་མ་ཆགས་པར་འཚར་ལོངས་འབྱུང་བཞིན་པའི་མེ་ཏོག་ཞིག་དང་གཉིས་སུ་མ་མཆིས་པས་དེ་བས་ཀྱང་བརྩེ་བས་སྐྱོང་བ་ཤིན་ཏུ་གལ་ཆེ་བས།  སློབ་མ་རྣམས་ལ་བརྩེ་བ་ཇི་འདྲ་བ་ཞིག་བཅང་དགོས་པ་གནད་དུ་དྲིལ་ན།  སློབ་མའི་མི་གཞི་ལེགས་ལམ་ལ་བཀྲི་བ་དང་།  སློབ་མའི་ལུས་སེམས་རིག་གནས་ཀྱིས་སྐྱོང་བ་གཉིས་སུ་འདུས་ཤིང་།  དེ་ལས་དང་པོ་ལ་སློབ་མའི་ལུས་སེམས་བདེ་ཞིང་ཐང་བར་སྐྱོང་བ་དང་།  སློབ་མའི་མི་གཞི་ལེགས་ལམ་ལ་བཀྲི་བ་གཉིས་ལས།  དེ་ལས་དང་པོ་ལ།  མི་ནི་སྐྱེས་མ་ཐག་པ་ནས་ཕ་མའི་བྱམས་བརྩེའི་འོག་ཏུ་འཚར་ལོངས་བྱུང་ཞིང་།  ཕ་མའི་བྱམས་བརྩེ་ནི་ཉི་མའི་འོད་ཟེར་དང་གཉིས་སུ་མ་མཆིས་པར།  ཁྱེའུའི་གཟུགས་གཞི་དང་སེམས་ཁམས་ལྷན་ཅིག་ཏུ་བདེ་ཐང་ངང་འཚར་ལོངས་འབྱུང་བ་ལ་མཐུན་རྐྱེན་ལེགས་པོ་བསྐྲུན་ཏེ།  འགྲོ་དུས་ཕ་མའི་མིག་གིས་འཚོ་བ་དང་།  ཟ་དུས་ཕ་མས་གང་དགོས་སྦྱིན་པ།  ཐ་ན་གཉིད་དུས་ཕ་མས་ཉལ་གོས་བཀབ་སྟེ།  བྱམས་བརྩེའི་དྲོད་ཁོལ་གྱི་དབལ་མ་ཡལ་ཞིང་།  བཟའ་བཏུང་མངར་མོའི་བཅུད་མ་ཉམས་པར་ལོ་ན་དྲུག་བདུན་ལ་སོན་དུས་སུ།  གློ་བུར་དུ་ཕ་མའི་བྱམས་བརྩེའི་རྩིབ་འོག་ནས་སློབ་གྲྭའི་གཞིས་ཁྱིམ་ཆེན་པོ་འདིར་སླེབས་པ་ཡིན་སྟབས།  དུས་དེ་ནས་བཟུང་དགེ་རྒན་ནི་ཕ་མའི་སྐུ་ཚབ་ཏུ་གྱུར་ཏེ།  སློབ་མ་རྣམས་ལ་འགྲོ་ལུགས་སྟོན་པའི་མ་མ་དང་།  ཤེས་རིག་སྟོབ་པའི་སྦྱིན་བདག   ལུས་སེམས་སྐྱོང་བའི་སྨན་པ་གཅིག་པུར་གྱུར་ཏེ།  སློབ་མ་རྣམས་ཀྱིས་དགེ་རྒན་ནི་སློབ་གྲྭའི་ནང་གི་གཉེན་ཉེ་ཁྱད་པར་བ་ཞིག་བཟུང་སྟེ།  ཅི་བཤད་དགེ་རྒན་གྱི་ངག་ལ་ཉན།  གར་འགྲོ་ན་དགེ་རྒན་གྱི་འགྲོས་ལ་ལྟ།  ཐ་ན་སློབ་གྲྭ་དེར་ཅི་བྱེད་ཐམས་ཅད་དགེ་རྒན་དཔེ་རུ་བཟུང་སྟེ།  སྐྱིད་ན་ལུས་སེམས་བཅོལ་སའི་གཞི་དང་།  སྡུག་ན་དཀའ་ངལ་སེལ་བའི་མགོན་ནི་དགེ་རྒན་ལས་གཞན་དུ་མི་དམིགས་ཕྱིར།  སྐབས་དེར་དགེ་རྒན་གྱིས་ཀྱང་བྱིས་པ་དག་གི་རྩེད་གྲོགས་འགྲོ་གྲོགས་གང་ལ་བྱེད་པ་དང་།  ཟ་རོགས་འདུག་གྲོགས་སུ་ལ་བསྟེན་པ།  བཤད་པའི་སྐད་ཀྱི་གདངས་དང་།  རྩེད་དུས་གདོང་གི་འཛུམ་སོགས་ལ་བརྟག་ཅིང་།  བྱིས་པ་གར་འགྲོ་ལུ་གུ་འཚོ་འཚོ་དང་།  བཟའ་བཏུང་སྤྱོད་ལུགས་ཕ་མས་སྐྱོང་སྐྱོང་ལྟར་གནངས་ཏེ།  སློབ་མ་དག་ལ་ཁྱིམ་དང་བྲལ་པའི་སྡུག་མི་འོང་ལ།  ཕ་མ་མེད་པའི་ཞད་མ་ལྷུང་ཞིང་།  བྱིས་པ་གཞན་གྱི་སྡུག་ཡས་མེད་པ་ཞིག་བྱས་ཏེ།  བྱིས་པ་དག་གི་ལུས་སེམས་བདེ་ཞིང་ལྟོགས་སྐོམ་མེད་པར་གཅེས་སྐྱོང་ལེགས་པོ་གནང་དགོས་པའོ། །གཉིས་པ་སློབ་མའི་མི་གཞི་ལེགས་པོ་ཆགས་པ་ནི།  གཙོ་བོ་སློབ་མ་དག་གི་རྒྱུད་ལ་ཡོན་ཏན་ལེགས་པོ་ཞིག་འབྱོར་རྒྱུ་དེ་ཡིན་ཞིང་།  དེ་ནི་གཙོ་ཆེར་དགེ་རྒན་དག་གི་རིག་གནས་ཆུ་ཚད་དང་།  དགེ་རྒན་གྱིས་སློབ་མ་ལ་འཆིང་བའི་བརྩེ་བ་ལ་རག་པས།  དགེ་རྒན་ལ་སློབ་མ་སྐྱོང་བྱེད་ཀྱི་ཡོན་ཏན་ཙམ་ཡོད་པས་མི་ཆོག་པར།  ཡོན་ཏན་དེ་སློབ་མ་རྣམས་ལ་ངེས་པར་བུམ་པ་གང་བྱོའི་ཚུལ་དུ་སྦྱིན་པའི་སེམས་པ་ལྡན་པ་ལ་བལྟོས་པས།  རང་ལ་ཡོན་ཏན་མེད་ན་ལག་པ་སྟོང་སྟོང་དུ་གནས་པ་ཇི་བཞིན་སློབ་མའི་མི་ཚེ་ལ་ཕན་པ་ཡེ་མི་འབྱུང་ཞིང་།  ཡོན་ཏན་ཡོད་ཀྱང་དུས་སུ་མ་སྦྱིན་ན་འདི་འདྲའི་དུས་ནི་ཕྱི་རུ་འབྱུང་བ་མ་ཡིན་པས།  སློབ་མ་འདི་དག་རིག་གནས་སྦྱང་བའི་སླད་དུ་གནས་འདིར་འདུས་ཤིང་།  རང་ཅག་རྣམས་ལ་དགེ་རྒན་དུ་བཀུར་བ་འདི་ལགས་ན།  སློབ་མ་མེད་ན་ང་ལ་དགེ་རྒན་ཞེས་པའི་མིང་མི་འབོད་ཅིང་།  ད་ལྟར་དགེ་རྒན་ཞེས་པའི་མིང་གིས་བོས་པས་ཡོན་ཏན་སྟོབ་པའི་ནོར་བདག་ཏུ་འགྱུར་དགོས་སྙམ་ནས།  རང་གིས་ཤེས་པ་ཕངས་མེད་དུ་སློབ་མར་སྦྱིན་ཞིང་།  གནས་སྐབས་སུ་མི་ཤེས་པ་བརྩོན་པས་ཤེས་པར་བསླབས་ཏེ།  འཕྲལ་དུ་སློབ་མའི་རྒྱུད་ལ་ཨེ་འབྱོར་གྱི་ཐབས་ལ་བརྩོན་ན།  ད་གཟོད་དགེ་སེམས་དང་ལྡན་ཞིང་ཡོན་ཏན་གྱིས་རྒན་པའི་གོ་མིང་དེ་འཐོབ་་འོས་ཤིང་།  དེ་ལྟར་བོས་པའི་མིང་དེ་ཡང་སློབ་མ་དག་གི་སེམས་ཀྱི་ཀློང་དུ་དད་པའི་ཤུགས་ཀྱིས་སྐུལ་བའི་ཆོ་ལོ་དོན་དང་མཐུན་པ་ཞིག་ཡིན་པས།  སློབ་མ་དག་གིས་དགེ་མིང་འཛིན་པ་རང་ཉིད་ལ་གུས་མི་གུས་དང་།  ཇི་ལྟར་གུས་པ་ནི་མཐར་བདས་ན་དགེ་རྒན་དུ་འབོད་པ་རང་གིས་རང་གི་ལུས་པོ་འདི་ལ་རིན་ཐང་ལོན་མ་ལོན་དང་།  སློབ་མ་རྣམས་ཇི་ལྟར་སྐྱོང་བའི་བདག་འབྲས་ཉིད་དུ་ངེས་ན།  དགེ་རྒན་གྱི་མིང་ཙམ་ཐོགས་ཚད་ཀྱིས་བློ་ལྡན་གྱི་བྱིས་པ་གང་ཡིན་ཚད་ལ།  འདི་ནི་ངའི་མཆན་བུ་ཡིན།  འདི་ནི་བདག་གི་སློབ་བུ་རེད་ཟེར་ཆོག་པ་ཞིག་མ་ཡིན་པར།  ཐོག་མར་ཁ་ནང་ལ་འཁོར་ཏེ་རང་སེམས་ཀྱི་ཀུན་སློང་ལ་བརྟག་ཅིང་།  སློབ་མ་དག་གིས་མིག་རིག་རིག་ཤེས་འདོད་ཀྱི་མིག་ཟེར་ཁྱོད་ལ་བཅོལ་པ་ལ།  ཁྱོད་ཀྱིས་སློབ་མ་དེ་རིགས་ཅི་ཡིས་བསྐྱངས་ཤིང་།  ཇི་ལྟར་བསྐྱངས་པ།  དེ་རིགས་ལ་ཕན་པ་ཅི་ཙམ་ཐོགས་པའི་དོན་ལ་ཡང་ཡང་བསམ་སྟེ།  ཚེ་འདིར་ལས་ཕོགས་རིན་མེད་དུ་ཟ་བའི་དཀོར་བདག་ཅིག་དང་།  ཚེ་ཕྱི་མར་སློབ་མ་རྣམས་ལ་ངོ་མི་གནོང་བ་ཞིག་ཅིས་ཀྱང་བྱ་དགོས་སོ། །

གསུམ་པ།  དགེ་རྒན་ཞིག་ཡིན་ན་དཔེ་ཆ་ཀློག་པ་ལ་དགའ་བའི་མི་ཞིག་ཡིན་དགོས་པ།

མི་ཞིག་འཇིག་རྟེན་འདིར་སླེབས་པ་ནས་ཡུལ་དུས་གང་དུའང་བློ་ཡུལ་ལས་འདས་པའི་དཀའ་ཁག་མང་པོ་དང་འཕྲད་འོང་བ་སེལ་བའི་ཐབས་ནི་སྣ་ཚོགས་མཆིས་ཀྱང་།  གལ་ཏེ་དཀའ་ཁག་དེ་རིགས་་སེལ་བྱེད་ལ་གྲོགས་པོ་ཞིག་བསྟེན་དགོས་ཚེ།  བློས་ཐུབ་ཀྱི་གྲོགས་པོ་ལ་ལ་ནི་ཡུལ་དུས་ཀྱི་གཞན་དབང་དུ་གྱུར་པས་རྔོ་མི་ཐོགས།  འགའ་ཞིག་ནི་རང་དང་འདྲ་བར་དཀའ་ངལ་དེ་རིགས་བསལ་བའི་ནུས་པས་དབེན།  རེ་འགའ་ནི་དོན་དེ་རིགས་ལ་སྤྲོ་བ་མེད་པས་རོགས་བྱར་མི་འདོད།  ཡང་རེ་འགས་གནད་དོན་དེ་འདྲ་ཨང་ཞེས་རང་ལ་ཁྱད་དུ་གསོད།  འགའ་རེས་ནི་དེ་ལྟར་བྱས་ན་རིན་གོང་ག་ཚོད་སྟེར་ཞེས་བྱས་པ་རིན་དུ་འཇལ་བ་སོགས་ཀྱི་སྣང་ཚུལ་མང་དུ་འབྱུང་བའི་ཕྱིར་ན།  ཡུལ་གང་དུ་ཕྱིན་ཀྱང་དུས་ནམ་ཞིག་ལ་འཁེལ་ཡང་གཞན་གྱི་ངོ་གདོང་ལ་མི་བལྟ་བར་ནམ་དགོས་འཕྲལ་དུ་བསྟེན་ཆོག་ཅིང་།  རིན་གྱིས་འཇལ་བ་དང་ལན་གྱིས་ལྡོན་པ་ལ་མི་བལྟ་བར།  མི་ཚེའི་གཏན་གྱི་གྲོགས་སུ་འོས་པ་ལ་དཔེ་ཆ་ལས་ལྷག་པ་གང་ཡང་མ་མཆིས་པས།  དཔེ་ཆ་ལ་བལྟས་ན་འདུག་གྲོགས་མེད་པའི་སྐྱོ་བ་བསལ་ཞིང་།  དཔེ་ཆ་དང་འགྲོགས་ཚེ་མ་ཤེས་པའི་མུན་པ་དྲུངས་ནས་དྭངས།  དཔེ་ཆའི་གྲོགས་ལ་བསྟེན་པས་ཁྲེལ་དང་བག་ཡོད་ཐོག་མའི་དུས་བཞིན་ཡུན་ནས་ཡུན་དུ་གནས།  དཔེ་ཆའི་གྲོགས་དང་འགྲོགས་ཤེས་པ་ནས་དེ་ཡིས་ཁྱོད་ཀྱི་གསང་བ་ནམ་ཡང་ཕྱི་ལ་བརྡོལ་བར་མི་འགྱུར་སྟབས།  དཔེ་ཆ་ལས་ལྷག་པའི་གང་བཅོལ་བློ་ཡིས་ཐུབ་པའི་གྲོགས་པོ་ཞིག་མེད་ལ།  དཔེ་ཆ་ལ་དོ་བའི་འགྲོགས་བདེ་བའི་མཛའ་བཤེས་ཀྱི་དྭངས་མ་མེད།  དཔེ་ཆ་ལས་གཞན་དུ་ངོ་ཚ་ཤེས་ཤིང་ཁྲེལ་ལྡན་གྱི་ནང་མི་གང་ཡང་མེད་ན།  དཔེ་ཆ་ནི་དགོས་འདོད་ཀྱི་ནོར་བུས་གཏམས་པའི་གྲུ་གཟིངས་ཆེན་པོ་ཞིག་དང་མཚུངས་པར།  རིག་གནས་ཀྱི་རྒྱགས་ཕྱེ་ཡིས་འཚོ་བའི་མི་རྣམས་ལས་ཀ་ཅི་ལ་ཞུགས་ཀྱང་།  ལུས་ཟུངས་ཀྱི་ལང་ཚོ་རྒྱས་ཤིང་རིག་པའི་ནོར་གྱིས་ཕོངས་པ་མེད་པར།  ཡུལ་དུས་གང་དུ་ཕྱིན་ཀྱང་ཐབས་ཀྱི་མི་རྡུགས་ཤིང་རིན་གྱིས་མི་དམན་པར།  གྲགས་པའི་དཔལ་གྱིས་འཚོ་ཞིང་སྙན་པའི་རྒྱན་གྱིས་རྒྱན་པར་བྱེད་པ་དང་།  དཔེ་ཆ་ནི་བློ་གྲོས་ཀྱིས་རྒན་པའི་བགྲེས་སོང་བྱམས་ལྡན་ཞིག་དང་མཐུན་པར།  ནམ་ཡང་ལྟ་བ་བོ་རང་ལ་བརྩེ་བའི་སེམས་ཀྱིས་སྐྱོང་ཞིང་དགོས་པའི་ཐབས་རྒུ་སྩོལ་ལ།  འདས་ཟིན་པའི་ལོ་རྒྱུས་ཀྱི་ཉམས་མྱོང་ཤགས་སུ་འགྱེད་ཅིང་མ་འོངས་པའི་ལམ་སྟོན་གྱི་སྒྲོན་མེ་ཐོགས་ཏེ།  ཡུལ་གང་དུ་བཞུད་ཅིང་དུས་གང་དུ་བྱ་བ་ཅི་ཞིག་བྱ་བའི་ཕྱོགས་སྟོན་གནང་བ་དང་།  དཔེ་ཆ་ནི་མཛའ་བཤེས་ཟབ་ཅིང་ཕྱི་ཐག་རིང་བའི་མི་ཚེའི་གཏན་གྱི་གྲོགས་པོ་ཞིག་དང་ཀུན་ནས་མཐུན་པར།  རང་ཉིད་ལ་དབུལ་ཕྱུག་གི་འགྱུར་བ་ཇི་འདྲ་བྱུང་ཡང་ཉེ་བཏུད་རིང་བཀྱེད་གང་ཡང་མེད་ཅིང་།  ཚེ་འདི་ཙམ་དུ་མ་ཟད་སྐྱེ་བ་ཕྱི་མར་ཡང་གྲོགས་ཀྱི་དྭངས་མར་གྱུར་ཏེ།  མཛའ་བ་མི་ལྷོད་ཅིང་བྱས་ན་ལན་གྱིས་ལྡོན་མིན་ལ་མི་བལྟ་བར་ལུས་དང་གྲིབ་མ་བཞིན་འགྲོགས་པར་འགྱུར་བ་ལགས་ན།  སུ་ཞིག་གིས་དཔེ་ཆ་བསྟེན་ན་དེ་ནི་ནམ་ཞིག་ཀུན་གྱི་གཉེན་དུ་འགྱུར།  གང་ཞིག་གིས་དཔེ་ཆའི་ཀློང་མྱུལ་ན་དེ་ནི་ནམ་ཡང་གཞན་གྱི་གོང་ན་སྡོད།  སུ་དག་གིས་དཔེ་ཆ་མང་དུ་བལྟས་ན་དེ་ནི་ཐབས་ཀྱིས་རྡུགས་པའི་སྐབས་མེད་པར།  རིག་པའི་མཛོད་དང་།  ཀུན་གྱི་མགོན།  ནད་ཀྱི་སྨན་དུ་འགྱུར་བ་གདོན་མ་ཟ་བ་ནི།  མ་བསླབ་པ་ལ་ཀུན་མཁྱེན་དུ། །འགྲོ་ན་རྒྱུ་འབྲས་ག་ལ་ལྡན། །ཞེས་པ་ལྟར།  མི་སུ་དང་གང་གིས་ཀྱང་དཔེ་ཆ་ལ་བལྟས་ཤིང་།  དེ་ལས་ཐོབ་པའི་ཡོན་ཏན་གྱིས་རང་ཉིད་འཇོན་ཐང་ཅན་དུ་བསྒྱུར་པར་མ་ཟད།  སློབ་གྲྭ་རུ་བསླབས་པའི་ཡོན་ཏན་དེ་ཙམ་གྱིས་མི་ཚེ་ཧྲིལ་པོ་ལེགས་པར་བསྐྱལ་ཐུབ་པ་ཞིག་གང་དུའང་མེད་ཅིང་ནམ་དུ་ཡང་མི་འབྱུང་བས།  མི་སུ་དང་གང་གིས་ལས་ཀ་ཅི་ཞིག་བྱ་ཡང་དཔེ་ཆ་དང་འབྲལ་ཐབས་མེད་ལ།  ལྷག་པར་ཁ་ཡི་ནུས་པ་ལ་བརྟེན་ནས་རང་ཁ་གསོ་བར་བྱེད་པའི་དགེ་རྒན་གྱི་རིགས་ལ་མཚོན་ན།  དེ་སྔ་སློབ་མ་ཡིན་པའི་སྐབས་སུ་སྦྱངས་པའི་ཤེས་བྱ་ཙམ་གྱིས་མི་ཚེ་ཧྲིལ་པོར་འདང་ངེས་པ་ཞིག་ནམ་ཡང་ཡོད་པ་མི་སྲིད་ཅིང་།  སློབ་གྲྭར་སྦྱངས་པའི་ཤེས་བྱ་ནི་རང་ཉིད་ཀྱི་མི་ཚེ་འདི་རིག་པའི་གླིང་དུ་ཇི་ལྟར་བགྲོད་པའི་ལམ་སྟོན་ཙམ་ལས།  མི་ཚེའི་ཧྲིལ་པོའི་འཚོ་རྒྱགས་ཡོངས་རྫོགས་མ་ཡིན་པས།  དཔེ་ཆར་མི་བལྟ་བ་ནི་ལས་རིགས་འདི་ལ་གཏན་ནས་རུང་བ་མ་ཡིན་པས།  མ་མཐའ་ཡང་ཉི་མ་རེ་ལ་དཔེ་ཆ་ཤོག་ལྷེ་ཉི་ཤུ་ཡན་ལ་བལྟ་ཞིང་།  ཟླ་བ་གཅིག་གི་ནང་དུ་དཔེ་ཆ་འགའ་རེ་བཀླག་དགོས་པ་ནི།  དགེ་རྒན་གྱི་ལས་ལ་བརྟེན་པའི་མི་ཞིག་གི་ཆེས་རྩ་བའི་ལས་ཀ་ཞིག་ཡིན་ན།  ཁོམ་ལོང་སྐར་མ་ཅི་ཡོད་དཔེ་ཆའི་སྟེང་ལ་སྤྱད་ཅིང་།  དཔེ་ཆར་བལྟ་བ་ཉིན་རེའི་འཚོ་བའི་གོམས་སྲོལ་དུ་བཟུང་ནས།  ས་ལ་སྡོད་པའི་སྐབས་དང་།  མལ་དུ་ཉལ་བའི་དུས།  ངལ་གསོ་སོགས་ཀྱི་སྐབས་ཐམས་ཅད་དུ་དཔེ་ཆ་ལག་དང་མ་འབྲལ།  མིག་ཤེས་དོན་མེད་ལ་མི་བརྫོད།  རིག་པ་རྒྱ་ཡན་དུ་མི་གཏང་བར།  སློབ་མའི་འཕེལ་རྒྱས་ཀྱི་སླད་དུ་དཔེ་ཆ་གྲོགས་སུ་བསྟེན།  མི་རིགས་ཀྱི་འདུན་མ་འགྲུབ་ཕྱིར་ནམ་ཡང་དཔེ་ཆར་འགྲོགས།   རང་ཉིད་སྤྱོད་ཡོན་གཉིས་ལྡན་གྱི་མི་འཇོན་ཐང་ཅན་དུ་འགྱུར་བ་ལ་དཔེ་ཆ་བལྟ་བའི་གོམས་སྲོལ་ལོབས་ཤིང་།   དཔེ་ཆར་བལྟ་བ་ལ་དུས་ཚོད་ཀྱི་སྔ་ཕྱི་མེད་པས།  དུས་དེ་རིང་ནས་མགོ་བརྩམས་ཏེ་དཔེ་ཆ་དང་འབྲལ་བར་མི་བྱའོ། །

བཞི་པ།  དགེ་རྒན་ཞིག་ཡིན་ན་ཕྱོགས་ཡོངས་ནས་སློབ་མའི་མིག་དཔེར་འཕེར་བ་ཞིག་ཡིན་དགོས་པ།

མི་ཞིག་འཇིག་རྟེན་འདི་ལ་ཐོག་མར་སླེབས་པ་ནས་གྱ་ཙེ་གོམ་པ་བགྲོད་ལུགས་དང་།  ཟ་མ་བཟའ་སྟངས།  སྐད་ཆ་བརྗོད་ལུགས།  གོན་པ་གྱོན་སྟངས་དང་བཅས་པ་གཞན་ལ་ལད་མོ་ཟློས་པ་ལས་རིམ་གྱིས་ཤེས་པ་ཡིན་ཞིང་།  མ་བསླབས་མ་སྦྱངས་པར་རང་ཉིད་སྐྱེས་པ་ཉིད་ནས་ཁོར་ཡུག་དེ་དང་མཐུན་པའི་རིག་གནས་གོམས་སྲོལ་ལྡན་པའི་ཡོན་ཏན་འཕེར་བོ་ཞིག་མི་སུ་ལའང་ཡོད་པ་མ་ཡིན་པས།  ཁོར་ཡུག་ཇི་འདྲ་བ་ཡིས་མི་དེ་འདྲ་བ་སྐྱེད་ཅིང་།  མི་ནི་ཁོར་ཡུག་གི་ཐོན་རྫས་ཁྱད་པར་བ་ཞིག་ཡིན་པས།  ཁྱེའུ་ཞིག་ཐོག་མར་རིགས་གང་དུ་སྐྱེས་པ་གཙོ་བོ་མ་ཡིན་པར།   གང་དུ་འཚོ་བའི་ཁོར་ཡུག་གཙོ་བོ་ཡིན་པ།  སྤྱང་ཀིའི་ཚོགས་སུ་འཚོ་བའི་བྱིས་པས་སྤྱང་སྐད་རྒྱག་ཅིང་ཤ་རྗེན་ཟ་བ་དང་།  རྒྱ་ཡི་རིགས་སུ་སྐྱེས་ཀྱང་བོད་ཡུལ་དུ་ནར་སོན་པའི་བྱིས་པ་དག་གིས་བོད་པ་བཞིན་བྱེད་པའི་དངོས་དོན་མང་པོས་དངོས་ར་སྤྲོད་པ་ལྟར།  ཁོར་ཡུག་གི་ཤུགས་རྐྱེན་ནི་མི་ཞིག་ལ་མཚོན་ན་ཤིན་ཏུ་གལ་ཆེ་ཕྱིར།  སྔོན་ནས་ད་ལྟའི་བར་དུ་རྒྱལ་ཁབ་དང་མི་རིགས་གང་གི་གྲས་སུའང་།  ཆོས་ཁང་དང་།  དགོན་པ།  སློབ་གྲྭ་སོགས་མི་མང་པོ་ལྷན་དུ་འདུས་ཤིང་།  དགེ་རྒན་དག་གིས་སློབ་བུ་མང་པོ་ལ་དུས་གཅིག་ལ་ཁང་པ་གཅིག་ཏུ་སློབ་ཁྲིད་བྱེད་པའི་སྲོལ་མ་ཉམས་པར་སྔར་བཞིན་གནས་ཤིང་།  ཐ་ན་སློབ་གྲྭའི་བཟོ་བཀོད་ཀྱི་བཀོད་པ་མི་ལེགས་ཀྱང་སློབ་སྦྱོང་གི་གོམས་སྲོལ་བཟང་པོའི་སློབ་གྲྭ་དག་ལ་ཕ་མ་དང་བུ་ཕྲུག་སུའང་རེ་བ་ཆེ་བ་ནི།  མི་ཡི་གྲས་སུ་རང་རྟོགས་ཀྱིས་རང་གི་ལུས་སེམས་ཆུན་ཞིང་རང་འགུལ་གྱིས་བསླབ་ལ་དཀའ་བ་སྤྱོད་པའི་མི་ནི་ཉི་མོའི་སྐར་མ་ལས་ཀྱང་ཉུང་ཞིང་།  འདི་ནི་མི་ཡི་རིགས་ལ་ཐུན་མོང་དུ་མངའ་བའི་སྤྱི་ཆོས་ཤིག་ཀྱང་ཡིན་པས།  བོད་ཀྱི་ཡུལ་དུ་ཆོས་གྲྭ་འགྲིམས་ན་དབུས་གཙང་གི་ཡུལ་ལ་འགྲོ་བ་དང་།  དེང་གི་དུས་ལ་སློབ་གྲྲར་འགྲོ་ཚེ་ཕྱི་རྒྱལ་དང་པེ་ཅིང་སོགས་ལ་འགྲིམས་པ་ནི།  མཐར་གཏུགས་ན་ཡུལ་དེ་གའི་སློབ་སྦྱོང་གི་ཆ་རྐྱེན་ལེགས་པ་ཉིད་དང་དམ་དུ་འབྲེལ་ཕྱིར།  ཀློག་ཀླད་དྲ་རྒྱ་སོགས་ཀྱི་ཆ་རྐྱེན་གྱ་ནོམ་པའི་དེང་གི་དུས་སུའང་མི་རིགས་ཚང་མ་འཚང་ག་ཤིགས་ཤིགས་ཀྱིས་སློབ་གྲྭར་འགྲིམས་པ་ནི།  རང་རྟོགས་མེད་པའི་མི་རྣམས་ཕྱི་ཡི་ཁོར་ཡུག་དང་།  གྲོགས་ཀྱིས་འགྲན་རྩོད།  ལྷག་པར་དགེ་རྒན་གྱིས་སློབ་གསོ་བཅས་ལ་བརྟེན་ནས།  རང་རྟོགས་ཀྱི་བསམ་བློ་བསྐྱེད་ཅིང་བྱིས་པ་དག་གི་ནུས་པ་སྔོག་པར་བྱེད་པ་བཅས་ཀྱི་སླད་ཡིན་པས།  སློབ་གྲྭའི་ཁོར་ཡུག་རྒྱ་ཆེན་པོ་དེའི་ནང་དུ་སྡོད་པའི་མི་རྣམས་ལས་རིགས་ཀྱི་ཆ་ནས་དབྱེ་ན།  དགེ་རྒན་དང་།  སློབ་མ།  ལས་འཟོ་བ་གསུམ་དུ་འདུ་ཞིང་།  དེའི་ནང་དུ་དགེ་རྒན་རྣམས་ནི་སློབ་ཁྲིད་ཀྱི་བྱེད་སྒོ་སྤེལ་མཁན་དང་།  སློབ་གསོའི་ལས་ཀ་བྱེད་མཁན་གཙོ་བོ་ཡིན་པས།  དགེ་རྒན་དག་ལ་སློབ་མ་ལེགས་པའི་ལམ་དུ་འཁྲིད་པ་དང་།  སློབ་མ་ལ་རིག་གནས་འཁྲིད་པ།  སློབ་མའི་སློབ་སྦྱོང་གི་ནུས་པ་གསོ་བའི་འགན་འཁྲི་ལྡན་ཞིང་།  སློབ་གསོ་ཞེས་པའི་འགག་རྩའང་སློབ་མ་དག་གི་ལུས་སེམས་གསོ་བ་དང་།  རིག་གནས་སློབ་པའི་ནུས་པ་གསོ་བ།  དེ་ལ་བརྟེན་ནས་སློབ་གྲྭ་གསོ་བ་བཅས་ཀྱི་དོན་ལས་མི་འདའ་ན།  དགེ་རྒན་རྣམས་ནི་སློབ་ཁྲིད་དང་སློབ་གསོའི་བྱ་བ་ཀུན་གྱི་སྲོག་ཤིང་ལྟ་བུར་གྲུབ་ཅིང་།  སློབ་བུ་དག་གིས་སློབ་གྲྭ་དེ་རུ་ཅི་ཞིག་བསླབ་པ་དང་།  གང་ལྟར་བསླབ་པ་དང་།  དེ་ལྟར་བསླབས་ནས་མཐར་ཐུག་མི་ཇི་འདྲ་བ་ཞིག་བྱེད་པའི་མིག་དཔེ་ནི།  ཁོར་ཡུག་དེ་རུ་དགེ་རྒན་དག་ལ་དཔེར་བལྟ་བ་ལས་གཞན་གང་ཡང་མ་མཆིས་པས།  རྒྱ་རིགས་ཀྱི་གཏམ་དཔེ་རུ།  དགེ་རྒན་ནན་མོ་ཡིན་ན་སློབ་མ་ལེགས་པོ་འཁྱོངས། །ཞེས་པ་དང་།  བོད་པའི་དམངས་ཁྲོད་དུའང་།  དགེ་རྒན་ཚྭ་ཁུ་བཟའ་རྒྱུར་དགའ་ན།  དགེ་ཕྲུག་སྒོག་པ་བཟའ་རྒྱུར་དགའ།  ཞེས་པ་དང་།  དགེ་རྒན་སྣ་ཐལ་ལ་དགའ་ན།  དགེ་ཕྲུག་ཇ་བཞུར་ལ་དགའ།  ཞེས་པ་སོགས་མང་དུ་འབྱུང་བ་བཞིན།  དགེ་རྒན་གྱི་གཏམ་བརྗོད་འདུག་སྟངས་དང་།  ཡིག་བྲིས་ཡོན་ཏན།  གོན་པ་ཆ་ལུགས།  ཐ་ན་ལུས་ཀྱི་བཟོ་ལྟ་དང་བཅས་པ་ནི།  སློབ་མ་དག་གི་མིག་མདུན་དུ་སྣང་བའི་དཔེ་གཞི་གསོན་ཉམས་ལྡན་པ་ཞིག་ཡིན་པས།  དགེ་རྒན་ཡང་ཚེ་སྲོག་གི་འཕར་རྩ་དྲག་ཏུ་ལྡིང་བཞིན་པའི་མི་ཞིག་ཡིན་ཞིང་།  དེང་རབས་ཀྱི་སློབ་གྲྭ་དག་ཏུ་བགྲང་བྱ་དྲུག་ཅུར་བརྒལ་པའི་དགེ་རྒན་རྒན་གྲས་ཀྱི་རིགས་ནི་ཧ་ཅང་ཉུང་བས།  དགེ་རྒན་ཞིག་ཡིན་ན་མཛེས་སྤྲས་ལ་མི་དགའ་བ་དང་།  རང་ཤེད་སྣང་མཐོ་བྱ་ལ་མ་དགའ་བ་མ་ཡིན་ལ་དེ་ལྟར་གཏན་བྱ་མི་ཆོག་པའང་མ་ཡིན་ཡང་།  སློབ་མའི་མིག་དཔེ་བྱེད་པའི་དགེ་རྒན་ཞིག་ཏུ་གྱུར་ཚེ།  སློབ་གྲྭ་རུ་སྡོད་དུས་སློབ་མའི་མདུན་དུ་གོན་པ་ཇི་ལྟར་གྱོན་ལུགས་དང་།  བཟའ་བཏུང་གང་ལྟར་སྤྱོད་ལུགས་དང་བཅས་པར་གཟབ་གཟབ་བྱ་དགོས་པར་མ་ཟད།  སློབ་ཁྲིད་བྱེད་པའི་དུས་སུ་སྐད་ཆ་ཇི་ལྟར་བཤད་པ་དང་།  འཁྲིད་སྟངས་ཇི་འདྲར་བྱེད་པ་སོགས་ལ་དོ་ཁུར་ནན་མོ་བྱ་ཞིང་།  ནམ་ཡང་ཁ་དན་དོན་ལ་གནས་ཤིང་།  བཤད་པ་ལག་ཏུ་སྟོར་བའི་ལག་ལེན་པ་ཞིག་བྱ་བ་ལས།  ཁ་སྟོང་ནང་ནས་ལ་རྒྱ་འདོན་མཁན་དང་།  ལག་ལེན་མེད་པའི་སྟོང་གཏམ་ལབ་རྒྱག་མཁན་ཞིག་གཏན་ནས་མི་བྱ་བར།  སློབ་ཁྲིད་ཀྱི་ཐད་དུ་དགེ་རྒན་དང་།  སྤྱོད་ལམ་གྱི་ཆ་རུ་མིག་དཔེ།  མི་གཤིས་ཀྱི་ཕྱོགས་སུ་དཔེ་ལྟོས་ཀྱི་ནུས་པ་བཏོན་ཏེ།  ནམ་ཡང་རང་ཉིད་ཀྱི་ལུས་སེམས་དང་སྤྱོད་ལམ་སོགས་ལ་ཡང་ཡང་བརྟག་ཅིང་།  སྤྱོད་པ་ལེགས་པ་དགེ་དང་།  ཡོན་ཏན་ལྡན་པ་རྒན་ཞེས་པའི་ཚད་ལྡན་གྱི་དགེ་རྒན་ཞིག་བྱ་རྒྱུ་ནི།   ལས་རིགས་འདི་ཡི་ཚད་གཞི་ཞིག་ཏུ་གཟུང་བར་བྱའོ། །

ལྔ་པ།  དགེ་རྒན་ཞིག་ཡིན་ན་དུས་ཚོད་དམ་འཛིན་བྱེད་པའི་མི་འཇོན་ནུས་ཅན་ཞིག་ཡིན་དགོས་པ།

དེ་ཡང་མི་ཚེ་ཞེས་པའི་ཚེ་ནི་དུས་ཚོད་ཀྱི་དོན་ཡིན་པ།  ཚེ་རིང་།  ཚེ་ཐུང་།  ཚེ་ཚད།  ཚེ་ལོ་ཞེས་པ་སོགས་ཀྱི་དཔེ་དག་ལས་ཤེས་ཤིང་།  མི་ཞིག་གི་ཚེ་ལོ་གཅིག་གི་ཡུན་ཚད་ནི་ལོ་རེར་ཉིན་ཞག་༣༦༥ཡིན་པའི་དབང་དུ་བྱས་ན།  མི་ཞིག་གལ་ཏེ་དགུང་གྲངས་བརྒྱད་ཅུ་གྱ་གསུམ་ཐུབ་པའི་དབང་དུ་བྱས་ཚེ་ཉིན་ཞག་སུམ་ཁྲི་ལས་མེད་ཕྱིར།  ཇི་སྐད་དུ་ཇོ་བོ་རྗེ་དཔལ་ལྡན་ཨ་ཏི་ཤའི་ཞལ་ནས།  ཚེ་ནི་ཡུན་ཐུང་ཤེས་བྱའི་རྣམ་གྲངས་མང་། །ཚེ་ཡི་ཚད་ཀྱང་ཇི་ཙམ་མི་ཤེས་པས། །ངང་པས་ཆུ་ལས་འོ་མ་ལེན་པ་ལྟར། །རང་གི་འདོད་པ་དང་བུ་བླང་བར་བགྱི། །ཞེས་གསུངས་པ་ལྟར།  མི་ཚེ་ལ་ཉི་མ་གཅིག་རྫོགས་པས་ཚེའི་ཚད་ཀྱི་ཆ་ཤས་ཤིག་འགྲིབ་ཀྱིན་ཡོད་པའི་ཁར།  མི་ཞིག་གི་ཚེ་ཚད་ལ་ལོ་གྲངས་ག་ཚོད་ཡོད་པའི་གདེང་ཚོད་སྐྱེ་བོ་མཆོག་དམན་བར་མ་གང་ལའང་ཡོད་པ་མ་ཡིན་པས།  མི་ཚེ་དོན་ལྡན་དུ་བྱ་བའི་སྙིང་པོ་ནི།  ཚེ་ཡི་འཕེན་པ་རྫོགས་པའི་རྗེས་སུའང་ད་དུང་བྱས་པ་དྲིན་དུ་དྲན་པའི་སྒོ་ནས་མིང་ནས་ཡང་ཡང་འབོད་ཅིང་།  མི་ནི་ཤི་བར་གྱུར་ཀྱང་མིང་ནི་མ་ཉམས་པར་མི་ཡི་རབས་བརྒྱུད་དུ་མར་འབོད་པར་བྱ་བ་དེ་ཡིན་ཡང་།  དེ་ལྟའི་མི་ཚེ་རིན་ཐང་ཅན་ཞིག་རོང་འབྲོག་སྐྱེ་བོ་ཕལ་པའི་ཚོགས་ལ་ཡོད་རེ་སྐན་ཡང་།  དགེ་རྒན་གྱི་མིང་དུ་བཏགས་པའི་མི་ཞིག་ཡིན་ན་མ་མཐའ་ཡང་སློབ་མ་དང་དེའི་བརྒྱུད་དང་བཅས་པས་ཡང་ཡང་གླེང་དུ་ཡོད་པའི་ཕན་པའི་ལས་ཀ་ཞིག་ཅིས་ཀྱང་བྱ་དགོས་ཕྱིར།  དགེ་བཤེས་ཆོས་ཀྱི་གྲགས་པའི་ཞལ་ནས་ཀྱང་།  སྐྱིད་ལ་སྡུག་པའི་འཇིག་རྟེན་མི་ཡུལ་འདིར། །ཤི་ཡང་ཕྱི་མིག་བལྟ་བའི་རེ་བ་ཡིས། །སྐྱེ་བོ་ཐམས་ཅད་རང་གི་ལག་རྗེས་ཙམ། །ཤུལ་དུ་ལུས་པའི་འབད་པ་ངང་གིས་བྱེད། །འདི་ན་འགའ་ཡིས་རང་གི་རྒྱུད་འཛིན་བུ་དང་སློབ་མ་རྗེས་སུ་བཞག །དེ་བཞིན་གཞན་གྱིས་ལེགས་བཤད་ནོར་དང་སྙན་པའི་གྲགས་པ་རྗེས་སུ་བཀོད། །ལ་ལ་འཆད་ཉན་ཆོས་ཀྱི་སྡེ་དང་རྟེན་རྣམས་བཞེངས་ནས་འདས། །གཞན་གྱི་ལག་རྗེས་བསགས་པའི་ནོར་དང་མཛེས་པའི་ཁང་ཁྱིམ་འདི་དག་ལགས། །ཞེས་པས་བསྟན་པ་ལྟར་ཡིན་མོད།  ངེད་ཅག་གིས་སྲིད་གཞུང་གིས་བསྐྲུན་པའི་སློབ་གྲྭའི་ར་བ་ཉམས་དགའ་བ་འདི་རུ།  གཞུང་བསྐོས་ཀྱི་སློབ་བུ་འདི་དག་ལ་ཟླ་ཕོགས་ཀྱི་རིན་འབབ་དང་མཐུན་པའི་རིག་གནས་ཡང་དག་ཅིག་འཁྲིད་ཅིང་སློབ་བུ་དག་ལེགས་ལམ་ལ་བཀྲི་བའི་དགེ་བའི་ལས་ཀ་ཞིག་བྱེད་པ་ནི།  དགེ་རྒན་གྱི་མིང་དང་ལྡན་པ་དག་གིས་ངེས་པར་བསྒྲུབ་འོས་ཤིང་ཚད་གཞི་ཆེས་དམའ་བའི་ལས་ཀ་ཞིག་ཡིན་ན།  ཞིང་འབྲོག་དམངས་ཚོགས་ཕལ་པ་བཞིན་ཉི་ཟླའི་འཆར་ནུབ་དང་དུས་བཞིའི་འཕེལ་འགྲོས་ཀྱི་ལས་ཀའི་ཁྱད་པར་ལྟར་བག་ཡངས་ཞེ་ལྷོད་དུ་སྡོད་མི་ཆོག་པར།  ལོ་རེའི་ཉིན་མཚན་གྱི་གྲངས་ཀ་དུས་ལ་བཅད་ཅིང་།  དུས་ཀྱི་ཁྱད་པར་འཕྲུལ་ཆས་སོགས་ཀྱིས་སྟོན་པ་ལྟར།  ནངས་སྔ་ལངས་དང་དགོང་འཕྱིར་ཉལ་གྱི་སྒོ་ནས་དུས་ཀྱི་ཚོད་ལ་བསྟུན་ཞིང་།  དུས་ཀྱི་ཐག་གཅོད་ལྟར་ལས་ཀ་རྩག་རྩིག་ལེགས་པར་བསྒྲུབ་པ་ནི།  དུས་ཀྱི་ངོ་བོར་བསྒོས་པའི་འགྲིག་ལམ་ཡིན་ལ།  དགེ་རྒན་ཞིག་གིས་ངེས་པར་བརྩི་འོས་པའི་ལས་ཀའི་བསྲུང་བྱ་ཞིག་ཀྱང་ཡིན་པས།  དུས་ལ་ནོར་འཛོལ་བྱུང་ན་ལས་ཀའི་གོ་རིམ་འཆོལ་ཞིང་།  ལས་ཀའི་དུས་ཚོད་འཆོར་བ་ནི་སྔོན་ནས་ད་ལྟའི་བར་དུ་རིག་པ་སློབ་པའི་དགོན་སྡེ་དང་སློབ་གྲྭ་གང་གི་འགྲིག་ལམ་དང་ཡང་མཐུན་པ་མ་ཡིན་པས།  དུས་ཚོད་ཀྱི་འདུ་ཤེས་གསལ་པོ་ཡོད་པའི་མི་སྒེར་དང་སྲིད་གཞུང་གང་ཞིག་ཡིན་ཡང་།  དེ་ལ་འགྲིག་ལམ་གྱི་འདུ་ཤེས་གསལ་པ་ཡོད་པ་དང་།  འགྲིག་ལམ་གྱི་འདུ་ཤེས་ཡོད་པའི་རིགས་ལ་ད་དུང་གཞན་དང་མི་མཐུན་པའི་འབྲས་བུ་གཡུར་དུ་ཟ་བ་ཡོད་པ་ལོ་རྒྱུས་ཀྱི་དངོས་དོན་མང་པོ་དང་།  མི་རིགས་སོ་སོའི་སྐྱེས་ཆེན་བགྲང་ལས་འདས་པའི་རྣམ་ཐར་སོགས་ལས་བདེན་དཔང་བྱེད་པའི་ཕྱིར་ན།  ངེད་ཅག་ནི་སློབ་བུ་དག་གི་མི་ཚེ་ལ་དུས་ཚོད་ཀྱི་འདུ་ཤེས་སྐྲུན་མཁན་གྱི་ལམ་བུ་ཁོ་ན་ཡིན་པས།  ལམ་མཁན་རང་ལ་དུས་ཀྱི་འདུ་ཤེས་མེད་ན།  མི་ཚེའི་བགྲོད་ལམ་ཇི་ལྟར་བགྲོད་ལུགས་སློབ་པའི་སློབ་མ་རྣམས་ལ་དེ་སྔའི་ཞིང་འབྲོག་གི་ལས་ཀ་གཉེར་བའི་ཕ་མ་ཉེ་དུ་རྣམས་ཀྱི་སོས་དལ་བག་ཕེབས་ཀྱི་བག་ཆགས་དེ་ལས་ཇི་ལྟར་འགོང་བའི་དཔེ་སྟོན་པས་སྟོང་ཕྱིར།  མི་རབས་ནས་མི་རབས་ལ་ངང་ལྷོད་སྒྱུད་ལུག་གི་སྤྱོད་པ་དེ་ལས་ཐར་ཐབས་མེད་པར་ལུས་ན།  ངེད་ཅག་གིས་ཟས་ཁམ་གང་ཟ་བའི་ཡུན་ལ་གཞན་དག་གིས་ཁམ་འགའ་རེ་བཟའ་ཞིང་།  དེ་ལྟར་ཉིན་བཞིན་བརྩེག་པས་རང་གི་སྐལ་བ་ཡང་རང་ལ་མི་དབང་བའི་དུས་ཤིག་བྱུང་དང་འབྱུང་གིན་ཡོད་པ་ཤེས་པར་བྱས་ཏེ།  ཐ་ན་དུས་ཚོད་སྐར་ཆ་ཅི་ཙམ་ལ་ཡིག་འབྲུ་ག་ཚོད་བཀླག་དགོས་པ་དང་།  ཉིན་གཅིག་གི་བཟའ་བཏུང་གི་དུས་ཡུན་ཅི་ཙམ་ལ་བྱེད་པ་ཡན་ཆད་ཀྱི་འདུ་ཤེས་གསལ་པོ་ཆགས་ཤིང་།  ལྷག་པར་དུས་ཚོད་ཤེས་པས་མི་ཆོག་པར།  གཙོ་བོ་རྒྱུན་འཆར་ལག་ཏུ་འཁེལ་བ་བྱ་རྒྱུ་ཤིན་ཏུ་གལ་ཆེ་བས།  བྱ་བ་དུས་ལ་བགོས་ཤིང་།  དུས་ཚོད་གོམས་སྲོལ་དུ་བྱས་ཏེ།  ལས་ཀ་ཅི་བསྒྲུབ་དུས་བཅད་ལྟར་ལེགས་འགྲུབ་བྱ་བར་བརྩོན་པ་རྒྱུན་གོམས་སུ་འགྲོ་བར་བྱའོ། །

དྲུག་པ།  དགེ་རྒན་ཞིག་ཡིན་ན་སློབ་གསོའི་བྱ་བ་ལ་ཞིབ་འཇུག་བྱེད་པའི་མི་ཞིག་ཡིན་དགོས་པ།

སློབ་གྲྭ་ཞེས་པ་ནི་ཕྱིའི་ར་བ་དང་ནང་གི་ཁང་ཁྱིམ་ཁོ་ནས་གྲུབ་པ་ཞིག་གཏན་ནས་མ་ཡིན་པར།  གཙོ་བོ་རིག་གནས་ཀྱི་རྒྱགས་ཕྱེ་འཚོལ་བའི་སློབ་མ་ཡོད་པས་སློབ་གྲྭར་འབོད་པ་དང་།  དེ་ཡི་དབང་གིས་རིག་གནས་མི་ཚེའི་འཚོ་རྟེན་དུ་བྱེད་པའི་དགེ་རྒན་གྱི་ལས་ཀ་བྱུང་ཞིང་དེ་སྒྲུབ་མཁན་གྱི་མི་མང་པོ་ཞིག་ལ་ད་གཟོད་དགེ་རྒན་ཞེས་པར་འབོད་པ་ཡིན་པས།  སློབ་མ་དང་དགེ་རྒན་ནི་སློབ་གྲྭ་ཞིག་གི་འགྲུབ་རྒྱུ་གཙོ་བོ་དག་ཡིན་ཞིང་།  དེ་ཡང་སློབ་ཁྲིད་ཀྱི་ལས་ཀ་ལ་བརྟེན་ཅིང་འབྲེལ་བར་གདའ་ཕྱིར།  དགེ་རྒན་གྱིས་ཅི་ཞིག་འཁྲིད་པ་ལ་བསླབ་དེབ་དང་།  ཇི་ལྟར་འཁྲིད་པ་ལ་འཁྲིད་ཐབས་དང་།  གང་ལ་འཁྲིད་པ་ལ་སློབ་མ་བཅས་ནི་ངེས་པར་མེད་ཐབས་མེད་པས།  བསླབ་དེབ་ནི་ཅི་ཞིག་འཁྲིད་བྱའི་དཔེ་གཞི་ཙམ་ལས་གང་ཞིག་འཁྲིད་བྱའི་ནང་དོན་ཡོད་ཚད་མ་ཡིན་པས།  དགེ་རྒན་དག་གིས་སློབ་འཁྲིད་དངོས་གཞི་མ་ཚུགས་པའི་གོང་རོལ་ལ་ཅིས་ཀྱང་བསླབ་དེབ་ཀྱི་སྒྲིག་གཞི་དང་།  ནང་དོན།  དམིགས་ཚད་བཅས་ལ་ཡང་ཡང་དཔྱད་ཅིང་།  སྐད་ཡིག་ལྟ་བུར་མཚོན་ན་དེབ་དེའི་ནང་དུ་ཐ་སྙད་ག་ཚོད་ཤེས་དགོས་པ་དང་།  ཚིག་གི་སྦྱོར་བ་ཅི་དང་གང་འདྲར་འདྲིས་སུ་འཇུག་པ་དང་།  རྩོམ་ཡིག་གང་དག་འཁྲིད་པ་བརྒྱུད་ནས་ཀློག་པ་དང་བཤད་པ་དང་འབྲི་བའི་ནུས་པ་ཅི་འདྲ་སྐྱེད་དུ་བསྲིང་བ་བཅས་ངེས་པར་བྱས་རྗེས།  གང་ལ་འཁྲིད་བྱའི་འཛིན་གྲྭའི་རིམ་པ་དང་།  འཛིན་གྲྭ་དེའི་སློབ་མའི་གྲུབ་ཚུལ།  སློབ་མ་དག་གི་རྨང་གཞིའི་ཁྱད་པར།  ཐ་ན་སློབ་སྦྱོང་གི་སྤྲོ་བ་བཅས་ལ་རྒྱུས་ལོན་གསལ་པོ་བྱེད་པ་དང་ཆབས་ཅིག་ཏུ།  འཁྲིད་བྱའི་ནང་དོན་དེ་རིགས་ཇི་ལྟར་འཁྲིད་པའི་ཐབས་གང་ཞིག་བསྟེན་པར་བྱ་བའི་ཐད་དུ།  མི་རིགས་ཐ་དད་པའི་སློབ་མ་རྣམས་ལ་རིག་གནས་གོམས་སྲོལ་མི་འདྲ་བའི་དབང་གིས།  བསམ་བློའི་འདུ་ཤེས་འཛིན་སྟངས་ཀྱང་མི་འདྲ་བ་ཡོད་པའི་ཆོས་ཉིད་དང་མཐུན་པར།  ཐོག་མར་སློབ་མ་ཐུན་མོང་གི་འཚོ་བ་དང་འདྲིས་ཆེ་བའི་ཤེས་བྱ་རྒྱུགས་ཆེ་ཞིང་རྟོགས་སླ་བ་ནས་མགོ་བརྩམས་ཏེ།  རིག་པ་ཡས་བགྲོད་ཀྱི་སྒོ་ནས་སློབ་པའི་ཐབས་སྩོལ་ཞིང་།  དེ་ལ་ཡང་སློབ་མའི་སྤྲོ་བ་འདེགས་པ་གལ་ཆེ་བས།  དགེ་རྒན་རང་གི་སྐད་ཆའི་བརྗོད་ལུགས་དང་།  ལུས་ཀྱི་སྟངས་སྟབས།  ལག་པའི་ཕྱག་རྒྱ།  སྒོ་སམ་བཀོད་སྒྲིག  དྲི་བ་འདོན་ལུགས་བཅས་ཀྱང་དུས་བསྟུན་བཅོས་སྒྱུར་དང་།  བབ་བསྟུན་གང་འཚམ་དུ་སྤྱད་དེ།  སློབ་མ་རྣམས་ནམ་ཡང་འཁྲིད་བྱའི་བསླབ་ཚན་དེ་ལ་རེ་བསྒུག་ཆེ་ཞིང་།  འཁྲིད་མཁན་དགེ་རྒན་དེ་ལ་ནམ་ཞིག་འཕྲད་འདོད་སྐོམ་པ་ཆུ་འདོད་བཞིན་ཆེ་ན།  སློབ་མ་རྣམས་རང་བཞིན་གྱིས་བསླབ་བྱ་དེ་སྦྱང་བའི་སྤྲོ་བ་འཕེལ་ཞིང་།  དགེ་རྒན་དེ་ལ་དད་པ་ངང་གིས་འབྱུང་བས།  དགེ་རྒན་ལ་གུས་པ་ཞེས་པ་ནི་མ་གཞི་སློབ་མ་རྣམས་ཀྱིས་དགེ་རྒན་དེ་དང་དེས་འཁྲིད་བྱའི་བསླབ་ཚན་ལ་འཆིང་བའི་ལྟ་ཚུལ་ཞིག་ཡིན་པས།  དགེ་རྒན་ནི་སློབ་མ་རྣམས་བསླབ་ཚན་དེའི་དཀྱུས་ལམ་ལ་བཀྲི་བའི་ལམ་པ་དང་།  རིག་པའི་རྟ་མཆོག་དེ་རིགས་བང་དུ་སྐུལ་བའི་འཆིབ་པ་ལྟ་བུའང་ཡིན་པས།  སློབ་འཁྲིད་ཀྱི་སྤུ་ཀ་ཇི་འདྲ་ཡིན་པ་ནི་དགེ་རྒན་གྱི་སློབ་ཁྲིད་བྱེད་སྟངས་ལ་བརྟག་གི  སློབ་མའི་ཚོགས་ཀྱི་རིག་པ་བཟང་ངན་ལ་བརྟག་པར་བྱ་རུ་མེད་པས།  དགེ་རྒན་ཞེས་པ་ནི་ཡིག་ཆ་སྒྲོག་འདོན་པ་ཞིག་གཏན་ནས་མ་ཡིན་ལ།  སློབ་མ་རྣམས་སློབ་གྲྭའི་ར་བར་འཚོ་བའི་རྫི་བོ་ཞིག་དེ་བས་ཀྱང་མ་ཡིན་པར།  གང་ཞིག་འཁྲིད་བྱའི་ནང་དོན་སྤྱི་མཚན་པ་དང་ལྐོག་གྱུར་པ་དེ་རིགས་སྐད་ཆའི་སྨྲ་དག་ཅིང་བརྗོད་པ་གནད་དུ་འདྲིལ་བ།  ཅི་བཤད་རིམ་པ་གསལ་ཞིང་ཡིད་ལ་འཛིན་བདེ་བ།  ཤེས་བྱའི་གནད་འབིག་ཅིང་རིགས་འགེབས་བྱ་སླ་བ།  སྦྱང་འདོད་ཀྱི་སྤྲོ་བ་འདེགས་ཤིང་རིག་གནས་ལ་དགའ་བའི་འདུ་ཤེས་བསྐྱེད་པ་ནི།  སློབ་ཁྲིད་ཀྱི་བརྒྱུད་རིམ་ཧྲིལ་པོར་ཚེ་སྲོག་དང་ལྡན་པའི་མི་ལུས་ལ་དབུགས་ཀྱི་རྒྱུ་བ་ནམ་ཡང་ཁྱབ་འདུག་པ་བཞིན།  སློབ་ཁྲིད་ཀྱི་བྱ་བ་ལ་ཟློས་གར་མཁན་པོའི་ཉམས་འགྱུར་དང་།  རྒྱང་སྒྲོག་པ་ཡི་སྐད་གདངས།  གྱེར་འདོན་པ་ཡི་འགྱུར་ཁུགས།  བཞད་གར་བ་ཡི་སྤྲོ་ཉམས།  རིག་གནས་པ་ཡི་ཡོན་ཏན།  ཤེས་བྱའི་ལམ་སྣ་འདྲེན་པའི་ལམ་བུ་ལྟ་བུའི་བྱང་ཆ་ལྡན་དགོས་པར་མ་ཟད།  སློབ་མ་རྣམས་ལ་སློབ་ཁྲིད་ཐེངས་རེར་ཉན་པ་ནི་རིག་པ་འཕེལ་ཞིང་ཤེས་བྱ་འཐོབ་པ།  སྤྲོ་བ་རྒྱས་ཤིང་བསླབ་ལ་སྐུལ་བའི་རིག་གནས་འཁྲབ་སྟོན་གྱི་གཞེན་སྐུལ་ཐེངས་རེ་ཡིན་པའི་ཚད་ལ་བསླེབ་ན།  དགེ་རྒན་རྣམས་ནི་སློབ་མ་སྐྱོང་བའི་སློབ་སྤྱི་དང་།  རིག་པ་གསོ་བའི་དེད་དཔོན།  དགེ་ལམ་ལ་སྐུལ་བའི་མཁན་པོ།  ལུས་སེམས་སྐྱོང་བའི་ཕ་མ་བཅས་སུ་འགྱུར་བ་གདོན་མི་ཟ་ན།  སློབ་ཁྲིད་ཐེངས་ཤིག་བྱེད་པ་ལ་གྲ་སྒྲིག་ལེགས་པོ་བྱ་དགོས་པས་གཞིར་བྱས་ཏེ།  རང་གིས་སློབ་མའི་མདུན་དུ་ཐོག་མར་ཅི་ཞིག་བཤད་པ་ནས།  མཇུག་མཐར་ཅི་ལྟར་བསྡུ་བའི་ཆ་ཐམས་ཅད་ལ་ཡང་ཡང་བསམ་ཞིང་བྱང་ཆ་ལྡན་པར་བྱ་བ་གལ་ཆེའོ། །
མདོར་ན།  དགེ་རྒན་ཞེས་པ་ནི་རིག་གནས་པ་གཞན་དག་དང་གཏན་ནས་མི་འདྲ་བར།  ཕ་མ་ལྟ་བུའི་བརྩེ་སེམས་དང་།  ཟློས་གར་བ་ཡི་སྟངས་སྟབས།  ཞིབ་འཇུག་པ་ཡི་དཔྱད་ཞིབ།  རིག་གནས་པ་ཡི་མཁྱེན་རྒྱ།  རྒྱ་སྒྲོག་པ་ཡི་སྐད་ཆ་བཅས་འཛོམ་དགོས་པའི་འཕྲལ་ཡུན་ཀུན་ལ་ཕན་ཞིང་།  འདི་ཕྱི་གཉིས་ལ་དགེ་བ།  རང་གཞན་ཡོངས་ལ་སྨན་པའི་ལས་ཀ་ཁྱད་དུ་འཕགས་པ་ཞིག་ཡིན་པས།  སློབ་ཁྲིད་ལེགས་པོ་ཐེངས་ཤིག་བྱས་ན་རང་གི་སྙན་པ་དེ་བཞིན་འཕེལ་ཞིང་།  སློབ་མའི་གུས་པ་སྔར་བས་བརྟ་བར་འགྱུར་བས།  དགེ་རྒན་ཞིག་ཡིན་ན་ཆེད་དུ་འཇིག་རྟེན་གྱི་གྲགས་པ་དོན་དུ་གཉེར་མི་དགོས་པར།  རང་ལས་ཀྱི་སློབ་ཁྲིད་ལ་ནན་ཏན་བྱ་ཞིང།  ཆོས་ཀྱི་དགེ་བ་དང་།   མི་རིགས་ཀྱི་ལ་རྒྱ།   རྒྱལ་ཁབ་ཀྱི་གཟི་བརྗིད་ཀྱང་སློབ་མའི་ཚོགས་ལེགས་པར་བསྐྱང་བ་དེ་ལས་གཞན་དུ་ཡོད་པ་མ་ཡིན་ནོ། །

བོད་ཀྱི་གླུ་བ་གླུ་མ།

གངས་ལྗོངས་ཀྱི་གླུ་པ་གླུ་མའི་གར་སྟེགས།

འཕྲོད་བསྟེན་ཤེས་བྱ།

ཁོར་ཡུག་སྲུང་སྐྱོབ། གཙང་སྦྲ་འཕྲོད་བསྟེན།

ཤེས་ཡོན་སློབ་སྦྱོང༌།

ཤེས་ཡོན་ནི་མ་འོངས་པའི་མདུན་སྒོ་ཡིན།

རྒྱན་གོས་ཆ་ལུགས།

བོད་མིའི་གནའ་དེང་གོས་ཀྱི་མཚར་ཉམས།

གློག་བརྙན་གསར་པ།

བོད་ཀྱི་གྲགས་ཅན་གློག་བརྙན་ངོ་སྤྲོད།།

བོད་ཀྱི་ཆོས་རིག་སྐད་ཡིག་གསུམ་གྱི་དྲ་འབྲེལ།

རྩོམ་རིག

  • ཡིད་འོང་ལྷ་མཚོ།
  • རིག་འབྱུང་དྲ་བ།
  • མཆོད་མེ་རྩོམ་རིག
  • བོད་ཀྱི་རྩོམ་རིག

སྙན་ངག

  • ན་གཞོན་གསར་པ།
  • གཏེར་མཛོད།
  • བོད་ཀྱི་རིག་མཛོད།

ལོ་རྒྱུས།

  • བཤད་མཛོད།
  • གདོད་མའི་ལོ་རྒྱུས།
  • དྲིས་ལན་དྲ་མཛོད།
  • གསལ་ལེ་རྒྱལ།

ཆོས་འབྱུང་།

  • ཆོས་ལུགས་ལོ་རྒྱུས།
  • ནང་བསྟན།
  • རྡོ་འབུམ་དཔེ་འཕྲིན།

སྐད་ཡིག

  • ཆ་འཕྲིན་ལག་རྩལ།
  • ཇོ་མོ་གླང་མ།
  • ཧི་མ་ལ་ཡ
  • སྨོན་ལམ

རིག་གཞུང་།

  • བོད་ཀྱི་རིག་གཞུང་།
  • སློབ་གསོ་དྲ་བ།
  • འབྲུག་དཔེ་མཛོད།

རིག་གནས།

  • རིག་གནས་དྲ་བ།
  • བོད་ཀྱི་རིག་གནས།
  • སེང་རྡོར་དྲ་ཚིགས
  • ཧི་མ་ལ་ཡའི་བོན།

དྲ་རྒྱ་གཞན།

  • གཉན་པོ་གཡུ་རྩེ།
  • རྡོ་འབུམ་དཔེ་ཕྲེང་།
  • ལོ་གསར་རིག་གཞུང་།