MonDecMon2019

སྤེལ་དུས་མཐའ་མ།09:45:57 AM GMT

རྩོམ་གསར།:

བོད་ལ་བོད་ཤོག་བཟོ་བའི་ལག་རྩལ་སྔ་མོ་ནས་ཡོད།

བོད་ལ་བོད་ཤོག་བཟོ་བའི་ལག་རྩལ་སྔ་མོ་ནས་ཡོད།

[1]ལྷ་ས་ནས་ཡར་ཀླུང་གཙང་པོའི་འགྲམ་ངོགས་སུ་ཆགས་པའི་སྙེ་མོ་རྫོང་དེའི་བོད་སྤོས་དང་། བོད་ཤོག པར་བརྐོས་བཅས་ལ་འགྲན་ཟླ་མེད་པ་གསུམ་ཞེས་གྲགས། དེ་དག་ལས་སྙེ་མོ་རྫོང་དར་གྲོང་གྲོང་བརྡལ་ཞོལ་ར་སྡེ་བའི་ཞོལ་རའི་བོད་ཤོག་ནི་མཚན་སྙན་ཕྱོགས་བཞིར་ཁྱབ་པའི་བོད་ཤོག་མཆོག་ཏུ་གྱུར་བ་ཞིག་ཡིན། རྒྱུ་མཚན་ནི་སྙེ་མོའི་ཞོལ་རའི་བོད་ཤོག་ནི་བོད་ཀྱི་བོད་ཤོག་ཆེན་པོ་གསུམ་གྱི་ཡ་གྱལ་ཡིན་ཞིང་། རྒྱུ་ར་དུག་རེ་ལྕག་གི་རྩ་བ་ལས་གྲུབ་པས། བྱི་བ་དང་འབུས་མི་བཟའ་བ་དང་། རུལ་སྐྱོན་མི་འབྱུང་བ། ཁ་དོག་མི་ཡལ་བ་ལ་སོགས་པའི་དགེ་མཚན་དུ་མ་ལྡན་ཕྱིར་ནང་བསྟན་གྱི་གསུང་འབུམ་དང་། དཔོན་ཕྱོགས་ཀྱི་ཡིག་ཆ་ལ་སོགས་པར་སྤྱོད་ཆེ་ལ། ལྷག་པར་དུ་བོད་ཀྱི་ལོ་རྒྱུས་ཡིག་ཚང་མང་པོ་ཡང་བོད་ཤོག་འདིའི་སྟེང་བཀོད་ནས་ཉར་ཚགས་བྱས་འདུག

སྙེ་མོའི་བོད་ཤོག་འདི་ལ་ད་བར་དུ་ལོ་ངོ་༡༣༠༠ལྷག་གི་ལོ་རྒྱུས་ལྡན་ཞིང་། སྔོན་ཆད་ལྗོངས་ཕྱི་ནང་དུ་མཚན་སྙན་ཆེ་ལ། ད་ལྟའང་སྙན་གྲགས་ཀྱི་བ་དན་ཕྱོགས་བཞིར་ཁྱབ་ཡོད། དེ་བས་སྙེ་མོའི་ཞོལ་རའི་སྡེ་མི་མང་ཤོས་ཀྱིས་སྔོན་ཆད་བོད་ཤོག་བཟོ་རྩལ་ལ་བརྟེན་ནས་འཚོ་བ་རོལ་བཞིན་ཡོད་མོད། འོན་ཀྱང་དུས་རབས་སྔོན་མའི་ལོ་རབས་༨༠བའི་ནང་ཤོག་བུ་གསར་བ་དར་ཆེ་བ་དང་། བོད་ཤོག་གི་རྒྱུ་ཆ་དཀོན་པ། མ་རྩ་ཇེ་མཐོར་སོང་བ་ལ་སོགས་པའི་རྒྱུ་རྐྱེན་གང་མང་ཞིག་གི་དབང་གིས་ཞོལ་རའི་སྡེ་བའི་མི་མི་ཉུང་བ་ཞིག་གིས་བོད་ཤོག་བཟོ་མཚམས་བཞག་ཏེ་ས་ཆ་གཞན་དུ་ཞོར་ལས་སུ་བྲེལ་བར་བརྩམས། ཡིན་ཡང་དགའ་འོས་པ་ཞིག་ལ། ད་ཆ་ཞོལ་ལྷ་སྡེ་བར་བོད་ཤོག་བཟོ་བའི་ཁྱིམ་ཚང་གཅིག་ཡོད་ལ། དེ་ནི་ཏག་ཏག་བོད་ཤོག་བཟོ་རྩལ་པའི་ཁྱིམ་རྒྱུད་རེད། ཡབ་ཀྱི་མིང་ལ་ཚེ་རིང་རྡོ་རྗེ་ཟེར་ཞིང་། ཁོང་ལ་བུ་སྐལ་བཟང་བསྟན་འཛིན་དང་བློ་ཆུང་ཟེར་བ་གཉིས་ཡོད་འདུག

[2]༡༩༥༡ལོར། ཚེ་རིང་རྡོ་རྗེ་ལགས་སྙེ་མོ་རྫོང་དྭགས་རོང་གྲོང་རྡལ་གྱི་བོད་ཤོག་བཟོ་བའི་ཁྱིམ་རྒྱུད་དུ་སྐྱེས། ཁྱིམ་རྒྱུད་འདིའི་བོད་ཤོག་བཟོ་མཁན་མི་རབས་གསུམ་པ་དེ་རེད། ༡༩༥༩ལོར་ལོ་ངོ་བརྒྱད་ལ་ཟིན་པའི་ཚེ་རིང་རྡོ་རྗེ་ལགས་ཕ་རྒན་དང་འགྲོགས་སྟེ་བོད་ཤོག་བཟོ་བར་སློབ་སྦྱོང་བྱས། སྐབས་དེར་གྲོང་ཚོ་དེར་དུད་ཁྱིམ་༡༦གིས་བོད་ཤོག་བཟོ་བཞིན་ཡོད་ཅིང་། ༡༩༨༥ལོར། བོད་རང་སྐྱོང་ལྗོངས་ཡིག་ཚགས་ཁང་གིས་དཔེ་རྙིང་སླར་གསོ་བྱེད་པར་བོད་ཤོག་འབོར་ཆེན་དགོས་པ་རེད། ཁོང་ཚོས་ཚེ་རིང་རྡོ་རྗེ་ལགས་བཙལ་ཞིང་། ཁོང་ལ་ལོ་ངོ་༡༨ཀྱི་བོད་ཤོག་བཟོ་བའི་གན་རྒྱ་བཞག་པ་རེད། གོ་སྐབས་དེ་དང་བསྟུན་ནས་ཚེ་རིང་རྡོ་རྗེ་ལགས་ཀྱི་བོད་ཤོག་བཟོ་བའི་རྟོགས་པ་སད་དེ་ཁྱིམ་ཚང་ཧྲིལ་པོས་རྒྱབ་སྐྱོར་དང་། ཚེ་རིང་རྡོ་རྗེ་ལགས་ནས་བོད་ཤོག་བཟོ་བའི་ལག་ཤེས་ཉམས་རྒུད་དུ་གྱུར་བ་སྐྱར་གསོ་བྱས་པ་རེད།

[3]ཚེ་རིང་རྡོ་རྗེ་ནི་ལྷ་ས་སྙེ་མོ་རྫོང་སྟེ་བོད་སྤོས་དང་བོད་ཤོག(2006ལོར་རྒྱལ་ཁབ་ཤུལ་བཞག་རིག་གནས་ཀྱི་མིང་ཐོར་ཚུད)གི་ཕ་སར་གྲགས་པའི་གནས་དེར་སྐྱེས་ཤིང་།  ད་ལྟ་ན་ཚོད62ཡིན་ལ། ལོ་ངོ50རིང་བོད་ཟོག་བཟོ་སྐྲུན་ལ་གཞོལ་བ་དང་། ཁོའི་བརྩམས་ཆོས་གཅིག་ནི་ཁྱད་དུ་འཕགས་པའི་བོད་ཀྱི་སྲོལ་རྒྱུན་ཤོག་བུ་རིགས་གསུམ་གྱི་གྲས་ཤིག་ཡིན།  དེ་ཡང་བོད་ཤོག་ནི་ཐུན་མོང་མ་ཡིན་པའི་རིག་གནས་ཐོན་རྫས་ཤིག་སྟེ་བོད་ཀྱི་དགོན་པའི་ཆོས་དཔེ་པར་འདེད་སོགས་ལ་གཙོ་ཆེར་སྤྱོད་པ་ཡིན།

[4]སྙེ་མོའི་བོད་ཤོག་གི་མ་བཅོས་རྒྱུ་ཆ་གཙོ་བོ་ནི་རེ་ལྕག་གི་རྩ་བ་ཡིན་པ་དང་དུག་ཤེད་ཡོད་པའི་རྩྭ་ཞིག་རེད། བོད་ཤོག་བཟོ་བའི་གོམ་སྟབས་དང་པོ་ནི་རེ་ལྕག་གི་རྩ་བ་བཀྲུས་རྗེས་ཉིན་གསུམ་ཙམ་ཆུ་ལ་སྦོང་དགོས་པ་དང་ཕྱིའི་པགས་པ་དང་འདམ་བག་བཀྲུས་རྗེས་ཉི་སྐམ་གཏོང་དགོས་ཀྱི་ཡོད། བོད་ཤོག་བཟོ་བའི་བརྒྱུད་རིམ་ནང་གི་དཀའ་ཚེགས་ཆེ་ཤོས་དེ་རྒྱུ་ཆ་བཙོ་རྒྱུ་དེ་རེད།

ཚེ་རིང་རྡོ་རྗེ་ལགས་བརྗོད་དོན། “གོང་གསལ་དེ་དག་གྲུབ་རྗེས་ཤོག་བུའི་རྒྱུ་ཆ་ཆུའི་ནང་བཙོ་དགོས་པ་དང་བཙོ་སྐབས་རྒྱུ་ཆ་མཉེན་པོ་དང་སེར་པོ་མ་ཆགས་བར་བཙོ་བཞིན་དུ་དཀྲུག་དཀྲུག་གཏོང་དགོས་ཀྱི་ཡོད། རེ་ལྕག་གི་རྩ་བར་དུག་ཤེད་ངེས་ཅན་ཞིག་ཡོད་སྟབས་དེ་བཙོ་སྐབས་ཐོན་པའི་རླངས་པས་ལས་ཀ་དེ་ཐེངས་དང་པོ་བྱེད་མཁན་ཞིག་ཡིན་ཕྱིན་ངོ་གདོང་གི་པགས་པ་བུད་ཀྱི་ཡོད”ཅེས་དང་ཁོང་གིས་རྒྱུ་ཆ་བཙོས་རྗེས་རྡོ་ལེབ་ཐོག་ཏུ་བཞག་ནས་རྒྱུ་ཆ་ལེབ་མོ་མ་ཆགས་བར་རྡུང་དགོས་ཀྱི་ཡོད་ཅེས་བཤད་བྱུང་།

[5]བོད་ཤོག་བཟོ་བའི་རང་བྱུང་རྒྱུ་ཆ།

དེ་སྔ་བོད་ཤོག་ལ་ཤོག་ལྡུམ་དུང་ལོ་མ་ཞེས་པའི་རྒྱུ་ཆ་རབ་དེ་ཕུད། སྟག་པ་ཤིང་དང་། ཨ་ག་རུ། རེ་ལྕག་སོགས་ཡིན་ལ། རྒྱུ་ཆ་མི་འདྲ་བས་སྤྱོད་སྒོ་དང་སྤུས་ཚད་མི་འདྲ་བའི་བོད་ཤོག་སྣ་ཚོགས་ཐོན་གྱི་ཡོད། དེ་ཡང་སྟག་པ་ཤིང་གིས་བོད་ཤོག་སྲབ་མཐུག་ཅི་རིགས་བཟོ་ཐུབ་པས་རྒྱུ་ཆ་ཡག་གྲས་སུ་བརྩི་བ་དང་། ཨ་ག་རུས་བཟོས་པའི་བོད་ཤོག་མཐུག་པས་རྒྱུ་ཆ་འབྲིང་ཡིན་རུང་ཆོས་གཞུང་འབྲི་ས་བྱས་ན་ལེགས་པོ་ཡོད། རེ་ལྕག་གིས་བོད་ཤོག་བཟོ་བའི་ཚེ་དུག་སེལ་དགོས་པས་རྒྱུ་ཆ་ཐ་མར་བགྲང་མོད། འབུས་མི་ཟ་བ་དང་ཡུན་རིང་ཉར་ཚགས་བྱེད་ཆོག་གི་ཡོད། བོད་ཤོག་བཟོ་རྩལ་ནི་རྒྱུ་ཆའི་པགས་པ་བཤུ་བ་དང་། འདུལ་བ། བཙོ་བ། སྦོང་བ། བཤལ་བ། དཀྲོག་པ། སྦྱོང་བ། བཀྲམས་པ་སོགས་ཀྱི་བརྒྱུད་རིམ་ལས་གྲུབ་ཡོད། བཟོ་རྩལ་དེ་ཉིད་བོད་ཡུལ་དུ་ཁྱབ་པ་མ་ཟད། རྒྱ་གར་དང་། བལ་ཡུལ། འབྲུག་ཡུལ་སོགས་སུའང་ཁྱབ་ཡོད།

དེང་སང་བོད་ཤོག་བཟོ་བའི་མ་རྒྱུ་གཙོ་བོའང་མཚོ་བོད་ས་མཐོའི་ཐོག་གི་རྩི་ཤིང་ཡིན་ཞིང་། གཙོ་བོ་ནི་སྔོན་བུའི་ལོ་མ་དང་། རེ་ལྕག སོ་མ་རཱ་ཛཱ་སོགས་ཡིན་རུང་། རྒྱུ་ཆ་དེ་དག་ལའང་ཡག་ཉེས་ཀྱི་དབྱེ་བ་ཡོད་པའི་ཁྲོད་སྔོན་བུའི་ལོ་མ་ཡག་ཤོས་དང་དྲི་ལྡན་རེ་ལྕག་སྡུག་ཤོས་ཡིན་ལ། རྒྱུ་ཆ་ཁག་སོ་སོའི་སྦྱོར་རྟ་བྱེད་སྟངས་ཀྱང་འདྲ་གི་མེད། ལྷག་དོན་དུ་ཤོག་བཟོའི་ལག་རྩལ་གོང་འཕེལ་དང་ཁྱབ་གདལ་གྱི་བརྒྱུད་རིམ་ཁྲོད་མི་སྣ་གྲགས་ཅན་དུ་མ་བྱོན་ནས་བཟོ་རྩལ་སྤུས་ལེགས་ཀྱི་བོད་ཤོག་མང་པོ་ཐོན། ཁོང་ཚོས་བོད་ཤོག་ལས་སྣོན་གྱི་ལག་རྩལ་ལ་ཡུན་རིང་ཞུན་བརྡར་བྱས་མཐར་དངུལ་ལོར་དང་། སྦྲག་འཛིན། བཀའ་བསྟན་གསེར་བྲིས་དངུལ་བྲིས་ཀྱི་ཤོག་བུ་རྩེ་གྲ་དུ་མ་ཐོན་ཡོད།

 

བོད་ཤོག་གི་དམིགས་བསལ་ཁྱད་ཆོས།

བོད་ཤོག་ནི་ལོ་རྒྱུས་ཡུན་རིང་ལྡན་པའི་དམིགས་བསལ་ཐོན་ཟོག་ཅིག་ཡིན་ཞིང་། དེའི་ཁྱད་ཆོས་གཙོ་བོ་ནི་མཁའ་རླུང་སྐམ་ཤས་ཆེ་ཞིང་གསོ་རླུང་དཀོན་པའི་ཡུལ་ནས་ཐོན་པས་སྤྱིར་ན་བརླན་གཤེར་འགོག་ཐུབ་པ་དང་། ཤོག་བུའི་རྒྱུ་ཆར་དུག་གཡའ་ཡོད་པས་རུལ་དཀའ་ཞིང་འབུ་དང་བྱི་བ་སོགས་ཀྱིས་མི་ཟ་བ། སྐྱུར་གྱི་རང་བཞིན་མི་ལྡན་ཞིང་སྲ་ལ་མཉེན་པ་དང་ལྟེབས་རྩེག་རྒྱག་པ་དང་རེག་བརྡར་བྱས་རུང་རལ་དཀའ་བས་ཡུན་རིང་ཉར་ཚགས་བྱེད་ཐུབ། ཁྱད་པར་སྲོག་ཆགས་ཀྱི་པགས་པ་ལྟར་སྙི་ཞིང་རལ་དཀའ་བ་དེས་སོ་སོའི་དགོས་མཁོ་ལྟར་ཆ་ཚད་གང་བདེར་བཟོ་ཆོག ལྷག་དོན་ཚོན་ཤོག་ནི་མཛེས་རྒྱན་དང་། ལེགས་སྐྱེས་དངོས་རྫས། དེབ་ཀྱི་རྒྱབ་ཤོག་སོགས་བཟོ་བར་དམིགས་བསལ་ཁྱད་ཆོས་ལྡན་ཡོད་ལ། ཁ་ཞེང་ཆེ་བའི་བོད་ཤོག་ནི་དེ་བས་ཀྱང་ཡིག་གཟུགས་སྒྱུ་རྩལ་དང་མཛེས་རིས་འབྲི་རྒྱུར་དགའ་བའི་མི་ཚོའི་གདམ་ག་ལེགས་ཤོས་ཤིག་རེད། དེའི་ཐད་ཀྱི་རྒྱུན་འཛིན་པས་བོད་ཤོག་ལ་མ་མཐར་ཁྱད་ཆོས་དེ་དག་ཡོད་པའི་ངོས་འཛིན་བྱེད་པ་སྟེ། ཉར་ཚགས་ཀྱི་དུས་ཡུན་རིང་བ་དང་འབུ་མི་རྒྱག་ལ་ཙི་ཙི་སོགས་ཀྱིས་སོ་མི་རྒྱག་པ་དང་། དུས་ཚོད་རིང་པོ་ཕྱིན་རུང་འཕྲོ་བརླག་མི་འགྲོ་བ། ཡི་གེ་གསལ་ལ་མི་རལ་བ། སྤོ་བདེ་ལ་ཉར་ཚགས་བྱེད་བདེ་བ། མཉེན་ལ་འཇམ་པ། སྣག་རྫོབ་མི་ཐེབས་པ། ཤོག་བུར་ཡུན་རིང་བལྟས་རུང་མིག་ལ་མི་གནོད་པ། ལྟེབས་ཉེས་མི་ཤོར་བ་དང་ཚོས་མི་ལོག་པ། ཤོག་རོའང་ཚུར་བསྡུ་བྱས་ནས་བཟོ་རྩལ་ཐོན་རྫས་བཟོ་ཆོག་པ་བཅས་རེད། ལྷག་དོན་དེང་གི་རྒྱལ་ཁབ་ཕྱི་ནང་གི་མཁས་དབང་ཚོས་བོད་ཤོག་ནི་སྲ་ཚད་དང་། གཉེན་ཚད། ཞིབ་ཚད་ཀུན་ནས་སྐབས་དེའི་ཡོ་རོབ་གླིང་གི་ཤོག་བུ་ལས་ཞན་པ་མེད་པས་རྩོམ་ཡིག་དང་མཛེས་རིས་གང་བདེར་འབྲི་ཆོག་ལ་ཤོག་གུར་དང་སྒེའུ་ཁུང་གི་ཁྲ་རྒྱན་སོགས་ཀྱང་བྱས་ཆོག་པ་འདུག་ཅེས་དང་། ཡང་གནའ་བོའི་བོད་ཤོག་ནི་སྲ་ཞིང་མཉེན་ལ་མཐུག་ཅིང་འབུས་མི་ཟ་བས་ཤོག་བུའི་ནང་ནས་ཁྱད་དུ་འཕགས་ཅེས་བསྔགས་བརྗོད་བྱེད་བཞིན་ཡོད།

བོད་ཤོག་ཐོན་རྫས་ལ་དམིགས་བསལ་གྱི་ཁྱད་ཆོས་དེ་དག་ཡོད་སྟབས་གྲུབ་མཐའ་ཁག་གི་ཆོས་གཞུང་པར་རྒྱག་ལ་མཁོ་བ་ཙམ་མ་ཟད། དངུལ་ལོར་དང་སྦྲག་འཛིན་བཟོ་ཆོག་པ་དང་། ཡིག་ཆ་སྣ་ཚོགས་འབྲི་ཆོག་པ། ཡིག་གཟུགས་སྒྱུ་རྩལ་དང་ཐང་ག་འབྲི་བྱེད་དུ་སྤྱོད་ཆོག་པ། འཕྲིན་ཡིག་འབྲི་ཤོག་དུ་སྤྱོད་པ། སློབ་སྦྱོང་བྱེད་པའི་སྤྱོད་ཤོག་སོགས་ཡིན། ད་ལྟ་གསར་དུ་ཐོན་པའི་བོད་ཤོག་ལ་ཀོ་ཤོག་དང་། ཚོན་ཤོག མེ་ཏོག་རིས་ཅན་གྱི་ཤོག་བུ། རྩྭ་ཤོག་སོགས་རིགས་མང་པོ་ཡོད་པ་དག སོ་སོའི་ཁྱད་ཆོས་ལ་བརྟེན་ནས་ཀོ་ཤོག་རི་མོ་དང་། ཤོག་བུའི་ལྒང་ཞུ། པར་དེབ། ཟིན་དེབ། ཤོག་ཁུག་སྤུས་ལེགས་སོགས་ཐོན་རྫས་གསར་པ་20ལྷག་ཙམ་བཟོ་ཆོག་གི་ཡོད།

མཐིང་ཤོག་བཟོ་བའི་ལག་རྩལ།

སྔ་མོའི་ལག་རྒྱུན་ལྟར་ན། གསེར་བྲིས་དངུལ་བྲིས་ཀྱི་གཞི་མཐིང་ཤོག་བཟོ་ཚུལ་ནི། ནག་མཚུར་གྲང་དུ་བཅུག་ནས་ས་རྡུལ་མ་སོང་བར་དྭངས་བསིང་ཕྱེ། ཐར་ནུའི་རླངས་པ་འདུས་པར་ཚྭ་ལ་བསྲེས་ཏེ་རས་ཚགས་ལ་བཙགས། དེ་གྲོ་ཆང་སྐྱུར་མོ་དང་བསྲེས་ཏེ་སྐོལ་དགོས་པ་དང་། ཚྭ་ལ་དང་ནག་མཚུར་ཉུང་ཞིང་གྲོ་ཆང་དང་ཐར་ནུ་མང་བ་དགོས། ཤོག་སྐྱ་ལ་བྱུགས་ནས་ཚོད་ལྟ་བྱས་ན། ཤོག་བུ་ནག་ལོག་གེར་སོང་ན་ཚོས་པའི་ཚད་ཡིན་པས་ཐབ་ལས་བླངས་ཏེ་ཅུང་ཞིག་བཞག་ནས་དྲོ་འཇམ་ཆགས་ན། དེའི་ནང་དུ་དེང་གི་ཤོག་བུ་སྣ་ཐུང་རིགས་མ་ཡིན་པའི་བོད་ཤོག་སྤུས་ལེགས་དྲངས་ཏེ་སྐམ་དུ་འཇུག དེ་ནས་ཨ་རུ་ར་འགའ་ཞིག་བརྡུངས་ཏེ་བཙོས་ནས་ཁུ་བ་རས་ཚགས་ལ་བཙགས་ཏེ་ཤོག་བུ་སླར་ཡང་དྲངས་ན་མཐིང་ཤོག་གྲུབ་ཅིང་། འདུལ་ཐབས་ནི་ཤོག་བུ་དཀྱུས་མའི་ལག་ལེན་ལྟར་བྱའོ། གཞན་དུ་ད་དུང་མགྲོན་བུ་བསྲེགས་པ་ཞིབ་བཏགས་བྱས་པ་ལས་གྲོ་ཆང་དང་ཛཱ་ཏི་གདུས་པའི་ཁུ་བར་ཤོག་བཟང་དྲངས་པས་མཐིང་ཤོག་འབྱུང་ཞིང་། ཨ་རུ་རའི་སྦྱོར་བ་གོང་ལྟར་ཡིན་ནོ།

ད་དུང་མཐིང་ཤོག་བཟོ་བའི་བརྒྱུད་རིམ་ནང་ཤོག་བུ་སྦྱར་ག་རྒྱག་རྒྱུ་དང་། ཤོག་བུ་སྦྱོར་བྱེད་གྲོ་ཞིབ་ལ་ཆུ་བླུགས་ནས་ལྡིར་དགོས་པ། ཤོག་བུ་གཉེར་མ་མེད་པར་སྦྱར་ཚར་རྗེས་འགྲེམས་དགོས་པ་དང་འཕྱིད་རྒྱུ། དེ་རྗེས་ཤོག་བུ་གཅིག་ལ་འབང་རྒྱག་པ་དང་གཅིག་ལ་མ་བརྒྱབ་པར་ཤོག་པང་སྟེང་དུ་གྲལ་སྟར་བསྒྲིགས་ནས་བསྣེམ་རྒྱུ། སྒྲོན་མེ་ཤིང་ལས་བཟོས་པའི་སྣག་ཚར་གཡག་ལུག་གི་ཀླད་པ་བསྲེས་ནས་མཉེད་རྗེས་སྤྱིན་བླུགས་ནས་ཤོག་བུའི་སྦྱར་ཁར་སྔོན་ལ་ཐེངས་ཅིག་བྱུག་དགོས། དེ་རྗེས་གཟི་ཁྲས་དབུར་བའམ་བརྡར་རྗེས་ཡང་བསྐྱར་སྣག་ཚ་བྱུག་དགོས། དེ་རྗེས་སླར་ཡང་དབུར་བརྒྱབ་ན་མཐིང་ཤོག་ཆགས་པ་དེར་རིན་ཆེན་སྣ་ལྔ་གང་ཞིག་གིས་ཡི་གེ་བྲིས་ཀྱང་ཆོག་གི་ཡོད་པ་དེ་ནི་གནའ་བོའི་བོད་ཀྱི་ཤེས་རིག་གི་གྲུབ་ཆ་གལ་ཆེན་ཞིག་རེད།

ཤོག་བཟོའི་ལག་རྩལ་རྒྱུན་འཛིན་པ།

ད་ཆ་སྲོལ་རྒྱུན་གྱི་ཤོག་བཟོའི་ལག་རྩལ་རྒྱུན་འཛིན་པ་མང་པོ་ལྷག་མེད་ཅིང་། མངོན་མིན་རིག་གནས་ཤུལ་བཞག་ཁྱབ་ཁོངས་སུ་གདེང་འཇོག་ཆེན་པོ་བྱ་ཡུལ་ནི་སྙེ་ཤོག་གི་རྒྱུན་འཛིན་པ་ཚེ་བརྟན་རྡོ་རྗེ་ཡིན་ཞིང་། ཁོང་གི་སྐྱེ་ས་འཚར་ས་ནི་སྙེ་མོ་རྫོང་དར་གྲོང་ཤང་ཞོ་ལེགས་གྲོང་ཚོ་ཡིན་པ་དང་། ལོ་རྒྱུས་ཐོག་སྙེ་ཤོག་ཐོན་ཡུལ་གྱི་གྲོང་ཚོ་གཙོ་བོ་དེ་ཡང་ཡིན་པས། དེ་སྔ་དུད་ཚང་ཕལ་ཆེ་བས་སྙེ་ཤོག་བཟོ་གི་ཡོད་རུང་སྙེ་ཤོག་གི་རྒྱུ་ཆ་གཙོ་བོ་རེ་ལྕག་གི་ཐོན་ཁུངས་དཀོན་ལ། བར་སྐབས་ཤིག་རིང་བོད་ཤོག་བྲིན་ཁ་མི་རྒྱུག་པར་བརྟེན་དམངས་གཙོའི་བཅོས་སྒྱུར་གོང་དུད་ཚང་16ལས་མ་ལྷག་པ་དང་ད་ཆ་དུད་ཚང་གཅིག་ལས་མ་ལྷག་པ་དེ་ནི་ཚེ་བརྟན་རྡོ་རྗེའི་ཁྱིམ་ཚང་རེད། བོད་ཀྱི་གཏམ་དཔེར་དཀོན་པ་ཙམ་གྱིས་རིན་ཐང་ཞེས་པ་ལྟར་ད་ཆ་ཁོང་ལ་གོང་འོག་ཀུན་གྱི་ཐུགས་ཁུར་རྒྱབ་སྐྱོར་ཐོབ་ནས་རྒྱལ་ཁབ་རིམ་པའི་རྒྱུན་འཛིན་པར་གྱུར་པ་མ་ཟད། ཁོང་གི་རྒྱུན་འཁྱོངས་ཀྱི་སྙིང་སྟོབས་ལ་བརྟེན་ནས་སྙེ་ཤོག་བཟོ་བའི་ལག་རྒྱུན་འཛིན་ཐུབ་པ་བྱུང་ཡོད།

བོད་ཤོག་གི་རྒྱུན་འཛིན་པ་གཞན་ཞིག་ནི་བྱམས་པ་བརྩོན་འགྲུས་ཡིན་ཞིང་། ཁོང་ནི་གྲགས་ཅན་བཟོ་རྩལ་མཛེས་རྩལ་ཆེ་མོ་བ་ཞིག་ཡིན་རུང་། དེར་བློ་ཡིད་ཚིམས་ནས་མ་བསྡད་པར་ལག་རྒྱུན་སྟོངས་ལ་ཉེ་བའི་བོད་ཀྱི་སྲོལ་རྒྱུན་བོད་ཤོག་བཟོ་རྩལ་སྦྱོང་བར་གཞོལ། 1990ལོ་ནས་བཟུང་བྱམས་པ་བརྩོན་འགྲུས་ཀྱིས་ལྷ་ས་གྲོང་ཁྱེར་སྙེ་མོ་རྫོང་དང་། ཉིང་ཁྲི་ས་ཁུལ་སྣང་རྫོང་། ཆབ་མདོ་ས་ཁུལ་སྨར་ཁམས་རྫོང་སོགས་སུ་དམངས་ཁྲོད་བོད་ཤོག་བཟོ་རྩལ་མཁས་ཅན་ལ་བཅར་འདྲི་བྱས་པ་དང་ཆབས་ཅིག ལག་རྩལ་སྦྱོང་འགོ་བཙུགས། དེས་མ་ཚད་ད་དུང་ལྗོངས་ཕྱི་དང་རྒྱལ་ཕྱིར་བསྐྱོད་དེ་བོད་ཤོག་བཟོ་རྩལ་བྱང་ཆུབ་པ་ཞིག་སྦྱངས་ཤིང་། ཁོང་གིས་སི་ཁྲོན་དཀར་མཛེས་སྡེ་དགེ་པར་ཁང་དུ་བསྐྱོད་དེ་ས་གནས་དེ་གའི་བོད་ཤོག་བཟོ་བའི་བརྒྱུད་རིམ་ལ་རྟོག་ཞིབ་ཞིབ་ཚགས་བྱས་པ་མ་ཟད། ད་དུང་ནེ་པ་ལར་བསྐྱོད་དེ་ས་གནས་དེ་གའི་ཤོག་བུ་བཟོ་མཁན་དང་ཉམས་མྱོང་སྤེལ་རེས་ཀྱང་བྱས།

ཁོང་གིས་ད་དུང《བོད་ཤོག་བཟོ་རྩལ་མྱུར་སྐྱོབ་དང་འཕེལ་རྒྱས་ཀྱི་བརྒྱུད་རིམ》ཞེས་པའི་དེབ་ཅིག་བརྩམས་ཡོད། 2006ལོར་བྱམས་པ་བརྩོན་འགྲུས་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་བོད་ཤོག་བཟོ་རྩལ་རྒྱུན་འཛིན་པར་གཏན་འཁེལ་བྱུང་བས་ཁོང་དགའ་ཚོར་ཆེན་པོ་བྱུང་།

མིག་སྔར་ལྷ་ས་འཇའ་ཚོན་ཆུ་མིག་ཕན་བདེའི་མི་རིགས་ལག་ཤེས་བཟོ་ལས་ཚད་ཡོད་ཀུང་སིས་ཐོན་སྐྱེད་བྱས་པའི་འཇའ་ཚོན་ཆུ་མིག་རྟགས་ཅན་གྱི་བོད་ཤོག་སྣ་ཁ་100ལྷག་ཙམ་ཡོད་པའི་ནང་ཀོ་བ་དང་དར་ཚོན་འདྲ་བཟོ་བྱས་པ་ཡོད་ལ། ཚད་གཞི་དང་ལྗིད་ཚད་སྣ་ཚོགས་བྱས་པའང་ཡོད་རུང་བྱམས་པ་བརྩོན་འགྲུས་ཀྱིས་ད་ཆའི་གནས་བབ་དེར་བློ་ཡིད་དེ་ཙམ་ཚིམ་པོ་བྱེད་ཀྱི་མེད། བོད་ཤོག་བཟོ་བར་ད་དུང་གསར་གཏོད་ཀྱི་བར་མཐོངས་ཧ་ཅང་ཆེན་པོ་ཡོད་པའི་ངོས་འཛིན་བྱེད་ཀྱི་ཡོད།

བྱམས་པ་བརྩོན་འགྲུས་ནི་ལྷ་ས་གྲོང་ཁྱེར་ཆུ་མིག་ལམ་དུ་གནས་པའི་ལྷ་ས་འཇའ་ཚོན་ཆུ་མིག་ཕན་བདེ་དམིགས་བསལ་སློབ་གྲྭ་འཛུགས་མཁན་དེ་ཡིན་ཞིང་། ཁོང་ལ་གཞན་ཕན་གྱི་ཕུགས་འདུན་ཞིག་ཡོད་པ་ནི་གནམ་འོག་གི་དབང་པོ་སྐྱོན་ཅན་ཚང་མས་ལག་རྩལ་སྣ་གཅིག་ཤེས་ནས་རང་ཁ་རང་གསོ་ཐུབ་རེ་བྱེད་པ་དེ་རེད། 1993ལོར་ཁོང་གིས་ཆེད་མངགས་དབང་པོ་སྐྱོན་ཅན་གཞོན་ནུ་དང་དྭ་ཕྲུག་གི་སློབ་གྲྭ་སྟེ་ལྷ་ས་འཇའ་ཚོན་ཆུ་མིག་ཕན་བདེའི་དམིགས་བསལ་སློབ་གྲྭ་ཐོག་མ་དེ་བཙུགས་པ་རེད།

1982ལོར་བྱམས་པ་བརྩོན་འགྲུས་ཀྱིས་ལྷ་ས་ཁྲེང་ཀོན་ཆུས་ལྷམ་བཟོ་གྲྭ་དང་པོའི་ཁྲང་ཀྲང་བྱས་ཙམ་ནས་བཟུང་སློབ་གྲྭ་འཛུགས་རྒྱུའི་བསམ་བློ་འཁོར་ཡོད་པས། ཁོང་གིས་1990ལོར་བཟོ་གྲྭའི་མིང་ཁྲེང་ཀོན་ཆུས་དབང་པོ་སྐྱོན་ཅན་ཕན་བདེའི་མི་རིགས་ལག་ཤེས་བཟོ་ལས་ཕྱོགས་བསྡུས་བཟོ་གྲྭ་ཞེས་པར་བསྒྱུར། སློབ་གྲྭ་འཛུགས་ཆེད་ཁོང་གིས་ལས་བཟོ་ཡོངས་སྐུལ་སློང་བྱས་ནས་ཟ་མཁས་སྤྱོད་མཁས་བྱས་པའི་གསོག་དངུལ་སྒོར་ཁྲི་40བཏོན་པ་རེད།

བྱམས་པ་བརྩོན་འགྲུས་ཀྱིས་འཇའ་ཚོན་ཆུ་མིག་ཕན་བདེའི་དམིགས་བསལ་སློབ་གྲྭའི་སློབ་མ་མང་ཆེ་བ་བོད་ཀྱི་ས་ཕྱོགས་ཁག་ནས་ཡོང་བ་ཤ་སྟག་ཡིན་པ་མ་ཟད། ད་དུང་མཚོ་སྔོན་དང་སི་ཁྲོན་ནས་ཡོང་བའི་བོད་རྒྱ་ཧུའེ་རིགས་སོགས་ཀྱི་སློབ་མ་ཡོད་ཅེས་བཤད།

བྱམས་པ་བརྩོན་འགྲུས་ཀྱིས་དགའ་ཚོར་ཆེན་པོའི་ངང“ད་ཆ་རང་ཉིད་དང་མཉམ་དུ་བོད་ཤོག་བཟོ་མཁན་8ཡོད་པ་མ་ཟད། ཁོང་ཚོའི་ཁྲོད་ཀྱི་ཁ་ཤས་བོད་ཤོག་བཟོ་ཧ་ཅང་མཁས་པོ་ཡོད”ཅེས་བཤད།

བྱམས་པ་བརྩོན་འགྲུས་དགའ་ཚོར་བྱེད་འོས་པ་ཞིག་ནི་2012ལོར་ཁོང་གི་སློབ་མ་མིག་དམར་དང་བསྟན་འཛིན་འཕྲིན་ལས་ཐེན་ཅིང་དུ་རྒྱལ་ཡོངས་ཀྱི་ལས་རིགས་སློབ་གྲྭའི་རྩལ་ནུས་འགྲན་བསྡུར་ཆེ་མོའི་ནང་ཞུགས་སྐབས། མི་སྒེར་གྱི་གསེར་གྱི་རྟགས་མ་དང་། མཉམ་སྡེབ་ཀྱི་གསེར་གྱི་རྟགས་མ། བོད་ཤོག་གི་རྒྱུ་ཆའི་གསེར་གྱི་རྟགས་མ། བཀོལ་སྤྱོད་ལག་རྩལ་གྱི་གསེར་གྱི་རྟགས་མ་བཅས་བྱ་དགའ་ཁག་4ཐོབ་པ་རེད།

བྱམས་པ་བརྩོན་འགྲུས་ཀྱིས་ས་ཕྱོགས་གང་སར་བསྐྱོད་ནས་སྲོལ་རྒྱུན་གྱི་བོད་ཤོག་བཟོ་རྩལ་སྦྱངས་པ་མ་ཟད། བོད་ཤོག་ལ་ཞིབ་འཇུག་བྱེད་ཤུགས་ཟམ་མི་ཆད་པར་ཆེ་རུ་ཕྱིན་པ་དང་སྦྲགས། ལག་རྩལ་རུ་ཁག་གི་སྣེ་ཁྲིད་དེ་གཅན་གཟན་རི་དྭགས་ཀྱི་པགས་པའི་རི་མོ་བཀོད་པའི་ཤོག་བུ་སོགས་ཐོན་རྫས་གསར་པ་ཞིབ་བཟོ་བྱས་པ་རེད།

བྱམས་པ་བརྩོན་འགྲུས་ལ་གཞི་ཆེའི་རི་མོ་ཞིག་ཡོད་པ་དེར་མི་ཚང་མས་མ་གྲོས་གཅིག་མཐུན་གྱིས་རི་དྭགས་ཀྱི་པགས་པ་རེད་ཅེས་ཤོད་ཀྱི་ཡོད་རུང་། བྱམས་པ་བརྩོན་འགྲུས་ཀྱིས་གད་མོ་དགོད་བཞིན་དུ་རི་མོ་འདི་བོད་ཀྱི་ས་དབྱིབས་ཆགས་ལུགས་མཚོན་པའི་སྲིན་པོ་གན་རྐྱལ་གྱི་རི་མོ་རེད། རི་མོ་འདི་འདྲ་བོད་ཀྱི་དགོན་སྡེ་ཚང་མར་ཡོད། རི་མོ་འདི་རིགས་ནི་ལྡེབས་རིས་དང་སྤྱིར་སྲོག་ཆགས་ཀྱི་པགས་པའི་ལོགས་སུ་འབྲི་གི་ཡོད། བདག་ཏུ་མ་བཟུང་བའི་སྲོག་ཆགས་ལ་སྲུང་སྐྱོབ་བྱེད་ཆེད། ང་ཚོས་བཟོས་པའི་བོད་ཤོག་ལ་ཚོད་ལྟ་བྱས་པས་ཧ་ཅང་ཡག་པོ་བྱུང་སྟེ་མིག་གིས་བལྟས་པ་ཙམ་གྱིས་དབྱེ་བ་ཕྱེ་ཐུབ་ཀྱི་མི་འདུག ལག་པ་ཐུག་ཚེ་གཞི་ནས་ཤོག་བུ་ཡིན་པ་ཤེས་ཐུབ་ཀྱི་ཡོད་ཅེས་བཤད།

ད་ཆ་ཀུང་སིའི་ཐོན་རྫས་ལ་རྒྱལ་ནང་གི་འཛད་སྤྱོད་པས་དགའ་པོ་བྱེད་པ་མ་ཟད། ཐོན་རྫས་ཁག་གཅིག་ཨ་རི་དང་། འཇར་མན། རི་པིན་སོགས་རྒྱལ་ཁབ་ཏུ་ཕྱིར་ཚོང་བྱེད་ཀྱི་ཡོད། འོན་ཀྱང་བྱམས་པ་བརྩོན་འགྲུས་ཀྱིས་དེར་བློ་ཡིད་དེ་ཙམ་ཚིམ་པོ་བྱེད་ཀྱི་མེད། ཁོང་ཚོས་ཐོན་སྐྱེད་བྱས་པའི་བོད་ཤོག་སྣ་ཁ་མང་ལ་སྤུས་ཚད་ཀྱང་ཡག་པོ་ཡོད་རུང་། མ་གནས་མཐོ་བས་ཕྱིར་ཚོང་བྱེད་བདེ་པོ་མེད། (ཆུང་བདག་གིས)



[1] ཨ་མྱེས་རྨ་ཆེན་འཕྲིན་སྟེགས་ནས་དྲངས།

[2] བོད་ལྗོངས་དྲ་བར་དྲངས།

[3] མཚོ་སྔོན་པོ་དྲ་བ་ལས་་དྲངས།

[4] བོད་ལྗོངས་ཉིན་རེའི་ཚགས་པར་ལས་དྲངས།

[5] གྲུང་གོའི་བོད་ཀྱི་གསར་འགྱུར་དྲ་ཚུགས་ལས་དྲངས།

བསྡུ་སྒྲིག་མཁན་ཁྲོ་གཏུམ།

བོད་ཀྱི་གླུ་བ་གླུ་མ།

གངས་ལྗོངས་ཀྱི་གླུ་པ་གླུ་མའི་གར་སྟེགས།

འཕྲོད་བསྟེན་ཤེས་བྱ།

ཁོར་ཡུག་སྲུང་སྐྱོབ། གཙང་སྦྲ་འཕྲོད་བསྟེན།

ཤེས་ཡོན་སློབ་སྦྱོང༌།

ཤེས་ཡོན་ནི་མ་འོངས་པའི་མདུན་སྒོ་ཡིན།

རྒྱན་གོས་ཆ་ལུགས།

བོད་མིའི་གནའ་དེང་གོས་ཀྱི་མཚར་ཉམས།

གློག་བརྙན་གསར་པ།

བོད་ཀྱི་གྲགས་ཅན་གློག་བརྙན་ངོ་སྤྲོད།།

བོད་ཀྱི་ཆོས་རིག་སྐད་ཡིག་གསུམ་གྱི་དྲ་འབྲེལ།

རྩོམ་རིག

  • ཡིད་འོང་ལྷ་མཚོ།
  • རིག་འབྱུང་དྲ་བ།
  • མཆོད་མེ་རྩོམ་རིག
  • བོད་ཀྱི་རྩོམ་རིག

སྙན་ངག

  • ན་གཞོན་གསར་པ།
  • གཏེར་མཛོད།
  • བོད་ཀྱི་རིག་མཛོད།

ལོ་རྒྱུས།

  • བཤད་མཛོད།
  • གདོད་མའི་ལོ་རྒྱུས།
  • དྲིས་ལན་དྲ་མཛོད།
  • གསལ་ལེ་རྒྱལ།

ཆོས་འབྱུང་།

  • ཆོས་ལུགས་ལོ་རྒྱུས།
  • ནང་བསྟན།
  • རྡོ་འབུམ་དཔེ་འཕྲིན།

སྐད་ཡིག

  • ཆ་འཕྲིན་ལག་རྩལ།
  • ཇོ་མོ་གླང་མ།
  • ཧི་མ་ལ་ཡ
  • སྨོན་ལམ

རིག་གཞུང་།

  • བོད་ཀྱི་རིག་གཞུང་།
  • སློབ་གསོ་དྲ་བ།
  • འབྲུག་དཔེ་མཛོད།

རིག་གནས།

  • རིག་གནས་དྲ་བ།
  • བོད་ཀྱི་རིག་གནས།
  • སེང་རྡོར་དྲ་ཚིགས
  • ཧི་མ་ལ་ཡའི་བོན།

དྲ་རྒྱ་གཞན།

  • གཉན་པོ་གཡུ་རྩེ།
  • རྡོ་འབུམ་དཔེ་ཕྲེང་།
  • ལོ་གསར་རིག་གཞུང་།